CBN News nih atulio Thantlang khua ah a cangmi Mai Sui Hlei Tial ruak phum le thial nak kong he pehtlai in thawngfiang a um khawhnak hnga ca ah tiah Nawlngeitu hna sinah Mai Sui Hlei Tial ruak tlun lio ah aa-mah-khang tu ka si lai a titu a pate Pu Kap Tir Thang cu a tanglei bang in biaruahnak kan ngeih.
- Kan nau nu Mai Sui Hlei Tial le a chungkhar konglam a tawinak in?
Kan fanu Sui Hlei Tial hi apa Pu Thang Kar (Lungler) le Anu Pi Tluang Zi (Tlangte) hna I an fanu a si. Unau pali chuak an si. A nih hi Upa lei in pahnihnak a si. Anau le hi nu pakhat le pa pakhat an si. An nih chung an van an chia. Nu le pa ai then mi an si. Tangruk a rak awng nain, tangsarih kai kho loin Malaysia ah 2014 kum ahkhan a rak kal. A nih hi chungkhar nih pa bantukin bochanmi a si. A thawng, a thekvak a tha. Har le sat fam ahcun sianginn te hmanh kai kho lo in chungkhar ka cawm lai tiah retheih raltumh bak in 2014 ah Malaysia a rak kal hi a si.
- Malaysia ah a thihning hi fiang in kan thei kho lai maw?
Malaysia ahhin anau (Dawt Khun) he a um mi an si. September 29 zaanlei ahkhan thil kan ton hi a rak si I, theihchin bia a si ko nain hitihin kan theihning a si. Zaanlei riantuan hi I thawh dingin ai tim ko ti a si. Riantuan lai innchung innleng in a nau he bia an iruah lio ah thawng a dai i, hi thil kan ton hi a si.
- Malaysia in Hakha tiang a ruak tlunpi nak le tawlrelnak ah zeibantuk harnak dah a um? Zeitluk in dah timhtuahnak nan ngeih khawh?
Malaysia ah Laimi chiatthat bu hna dawtnak le chungkhat hawikom hna tawlrenak thawng in ruak hi Lailei tlunpi ding ah khan a si. Malaysia in Kawlram phak khawhnak tiang ca ah a herhmi cozah ca le form vialte a herh tiang tawlrel a si ko. A tulio COVID-19 caan har ruang ah hin tlunpi khawh a si te hnga maw tiah kan lung cu a rak hring peng ko. Cuticun, Taanzung lei tlam a tlin in Vanlawng tlunpi ding tlam a tling tiah, thawng an kan thanh. Kam khat lei ah tlunpi khawh hmanh ah ramchung COVID-19 caan le Yangon in COVID lio ahhin an hung lan kho tak te hnga maw timi hi biatak in kan phan mi a rak si. Asinain, hika lei ah tawlre tu bik dingmi hi cu keimah pumpak nih hmunthum ah kalding ka kal. Uknak lei le Ngandamnak lei nawlngeitu hna sin ahhin bochan deuh mi upac minung kan fial hna. A tha ko lai an kan ti. Kan tlamtlinh ko lai tiah kan rak i ruah ko. Yangon khua in in October (3) zaan 9:48 pm in kan rak chuak tiah thawng an kan thanh in khan kan fanu ruak hi kan tlunh khawh ko lai hi the tiah kan zumh a si.
- Kan naunu Mai Sui Hlei Tial Ruak tlunhnak le hi tiangtiang linhsatnak ahhin a hodah (asiloah) zei mibu dah tuanvo a ngei bik tiah na ruah.
Kan fanu ruak umkalnak kong hi nihin cu Social Media chan a si ca ah thawngpang a rang ngai I, a khuapi in a kan daw nih tuarpi nak ah an kan fuh ngai. Ruak tlunpi kong COVID-19 Runvennak Komiti nih an theih i an ka auh tikah thil sining tampi ai thleng. Cu hlan deuh te ah kal awk le len awk a simi le Ca kan pek awk a herh mi zong tha tein ka pek. COVID-19 Runvennak Komiti nih an ka auh. Thil sining an hun ka hal. Ka chim. Kan sin ah thawng na kan thanh lo tiah an hunk a ti. An chim mi cu hi kong ah kan palh lo. Nan palh ve lo. Hi kong ah zeitin dah nan tawlrel lai tiah an hun ka hal. Ramdang in ramchung ah ruak tlunpi khawh a ngah ti lo tiah bia kan chah tiah an ka ti.
Cuti thil sining a hung um tikah fak piin zaangfah kan nawl hna. Malaysia taanzung in siseh, Yangon zong in tlunnak nawl pek kan si ko ca ah zei kan ti hnga kan zangfah ulaw tiah ka hal hna. Asinain, “Meeting biachah nak nawl kan ngeih cang ca ah a si thiam lo” an ka ti bak ko. Hi ruak kong ah Aa-mah-khang tu hodah um tiah an hal lio ah keimah nih kan khan lai ka ti. Asinain, “Myone Ngandamnak Lutlai (TMO) nih Pyine Ngandamnak hmanh nih an theih cang, cu ca ah Hakha hmanh an lonh kho lailo. Khoika dah a ruak na chiah lai tiah” tiah a hun ka ti. Pyine tiang nih a hun ka ti khan cun lawipah lampi thluangthluan ruak kong ah lungre a thei ngaingai cang. Lamlak ah a rak ra cangmi cu zeitindah khua kan khan lai tiah lungre lawng a thei ko cang. Hakha hmanh a lut kho lailo ti a si tikah Hakha a nute te ka chawnh hna lai tiah ka ruat.
Kan ruak tlunpi nak kong he pehtlai in kan upat mi Pu Ram Khar hi tuan te khan bawmh ka rak hal mi a si. A mah hi lunglawm thatho tein bawmh awk ah arak ka kamhtu a si. Hi thil kan hun ton in a mah mawtaw bak in a kan bawmh. Hakha khua ah Pyine ah aka bawmh. Kan tluang. Hakha kan lonh khawh. Asinain, Laipawnglung kan phak ahcun nan lut kholo tiah an kan ti.
- Laipawnglung thil cangmi kong he nawlpat nak le lamkam vuinak kong ah fiang deuh in theih kan duh ko.
Kan bochan mi Pu Ram Khar nih an hun kan kham khan, thil sining hrilhfiah buin fak piin a nawl hna.An nih an kan lehnak bia cu “Meeting biachahnak cu kan leet kho lo” timi bia a si I, cu ruang ah ramlak kan i chiah le kan i phum nak hi a si. Laipawng lung ah ruak tuamhlawm tu minung I chuahpi hna uh an kan timi minung (4) zong cu ready tein an um ve ko. Kan nawl len ko nain a donghnak kan bia cu “Khualeng ah nan i phum a hau. A herh ah cun mei zong in teh nan khangh ko” tiah an kan ti.
- Lamkam ah phum a si tikah hin JCB auhnak le phumnak timi hi nawlngeitu hna nih an tuahmi a si maw?
JCB auhnak le phumnak timi ahhin JCB hi kanmah tein kan i hlan in phum mi a si. Nawlngeitu hna nih, “Gate chung hrim nan luhpi kho lo. Tuzaan hrim ah nan duh nak poah ah vai phum uh” tiah an kan ti tikah Laimi kan ngeih bal lomi kan I phumnak hi a si. Nan duhnak paoh ah I phum uh ti a si tikah, kan upat mi Pu Thanghrim nupi kan hal i, kan ngaihchiatnak a kan tuarpi. Ruak kan iphumnak hi kanmah te nih kan ithim mi hmun a si i, lamkam ah a si ko.
- Hi thil nan tonmi kong ah biakhiak tu nawlngeitu hna cung ah nan lungthin na kan ruah kho lai maw?
Kan lungfak tuk henta. Nihin kan chan ah cun aithat ai nawng le sarthi hmanh nih thlanttha an hlawh lo hmanh ah thlan chia an hlawh. Kan nih cu thlanchia hmanh kan hlawh lo. Thinglung hlonh khi kan si ko. Kan tuar tuk hen ta. Kan tuar tuk.
- Hi thawngpi cu nihin Laimi sinah fak piin a hung si sukhak cang. Hmailei ah hibantuk um ti lonak hnga hi teh na saduhthah a um maw?
Miphun dang hruaitu hna he kan i ton tikah, kan ruahnak le kan nunphung ai dang. Atu lio cu COVID-19 caan he kan si fawn, nawlngeitu hna nih mipi an kan runven ruang a si ko tiin a tha lei kan ruah ve mi a um ko. Asinain, hitluk tiang chungkhar lei nih kan i timhlamh vemi le fimhlawn ding ah kan i nawlphiar mi cungah a ngah lomi hi cu kan thin cu a fak ko. Hi lio ah Kanmah lawngin kan tuar rua kan ti nain mipi nih fak tuk an kan tuarpi. Kan Laimi phun ning in nan kan hrawmpi. Kan nih chung nih cun kan hei tuar ko cang. Asinain, nihin kan tonmi thil hi hmailei ah cun Laimi le Thantlang khuapi nih kan ton ti lo ding cu fak piin saduh ka that ngai te.
- Mipi sinah na biacah duhmi kan chim law?
Kan intuarnak, kan ngaichiatnak vialte a kan hrawm pi tu miphun hawi vialte cungah “Kan I Lawm” tiah lawmhnak bia ka rak chim. Kan nih ngaihchiatnak in kan Laimi phun chungah kan ton rih lomi thil ton hi chungkhar santlaih lo zong a si ko lai. Asinain hithil kan ton tikah kan umnak cio ah Laimi kan i dawt ning ka ruah tik ahhin, hi bantuk in Dawtnak le Zawnruahnak he pakhat le pakkha kan tuanbia hi kan tial khawh chin nakhnga le miphun dang hmai ah kan I dawt alangh nak ca ah cang chin hram ko seh.
CBN News nih Thantlang khua GAD zung le GAO cu pehtlaih a si nain thawnglehnak le fianternak an tuah rih lo. Thantlang peng COVID-19 Runvennak Komiti nih Meeting Biachahnak pakhat ruangah tutan Thantlang khua ah tonnmi Lamkam ruak phumnak le thialnak thil linsa a chuah hi a si.
