Mandalay ramthen,Madaya peng Ta-Nga khuate phungki sianginn ah hmun a khuar mi SAC ralhraang riahhmun kahdohnak ah SAC captain Chit Khaing telhin 12 an thi tiah PDF Mandalay nih an thanh.
Nihin May 10 zinglei slm 5:00 tluk khan PDF Mandalay phu nih Madaya in a chaklei meng 2 tluk aa hlat nak Ta-Nga khuate phungki sianginn ah hmun a khuar mi SAC cu an va doh hna hi a si i zinglei slm 5:45 tluk ah tlamtling tein an laak khawh.
Kahdohnak chungah SAC Drone Jammer pakhat pin ah meithal le kuanzen tampi an laak i captain Chit Khaing telhin ruak 12 tluk an char. SAC lei in a zaam mi zong an tam i dothlennak ralkap lei in minung 1 nunnak a liam ve tiah theih a si.
SAC sinin hriam an laak mi chung ah Captain Chit Khaing aa tlaih mi pistol meithal cu ngakchia lentecelhnak plastic pistol a si tiah an cathanh chungah an langhter chih.
