Kumkhat chung ah Korea hlasakthiam phu BTS hna nih teinak an hun hmuh cuahmah hnu ah a tu cu Twitter zong ah Follwer tam bik ngei mi hlasakthiam phu an si than cang.
Vawleicung hlasakthiam phu hna lakah Follower tam bik a rak ngei mi mirang hlasakthiam One Direction lonh in BTS nih 31.52 million followers in a tambik record thar an tial cang. A tulio ah One Direction phu cu 31.51 million followers an ngei lio a si.
2020 kum chung ah vawleicung hla lei he pehtlai in BTS phu hi chimcaih cem mi ah an cang. An chungtel a si mi Jungkook nih voikhat a post mi hoi hna cu twitter cung ah retwwet a tong bik ah a cang.
Mirang ram ah hlasakthiam One Direction phu hi tukum ah kum 10 an tling ve cang nain 2016 kum thawk in a phu in hlasak le riantuan an ngeih tilo ruang ah an tweeter zong ah ca an post theng ti lo ti a si. Pakhat cio nih an ngeih mi an account tu ah cun minung pakhat nih 30 million follwers cio an ngei hna.
BTS phu nih an ngeih mi Twitter cu minung nuai 31.51 followers an ngei cang i, promotion he ai pehtlai mi account ah cun nuai 26 follower hrawng an ngei tiah hmuh khawh a si.
Tukum 2020 chung ah BTS cu Best Entertainment of The Year a pek hna. BTS le One Direction hnu ah followers tambik a ngei mi hi Coldplay phu an si i, an nih hi cu pakhat tete in twitter ah an lang lemlo ti a si.
Nihin vawleicung ah Twitter cung ah follwer tambik a ngei mi hi US President hlun Barrack Obama, Justin Bieber, Katty Perry, Rihana le Christiano Ronlado hna an si.
