PDF Nih An Kan Kah Ṭhan Ahcun ThanTaung Khua Chung Hriamngan In Kan Kah Lai Tiah SAC Ralkap Nih An Tlerh Hna
=======================================================
PDF nih an kan kah ṭhan ahcun ThanTaung(သံတောင်) khua chung ah hriamngan in kan kah lai, tiah SAC ralkap nih mizapi cu an tlerh hna.
June 22 ah Karen ramkulh, ThanTaung khua chung um biaknak hruaitu hna le khuanu khuapa hna cu PeLayWay(ပေလေဝေ) Khrihfa Biakinn ah SAC ralkap nih an auh hna i, a cunglei bantukin an tlerh hna hi a si, tiah Taw Oo Karen News nih a langhter.
“ThanTaung khua chung ah humhimnak kan lak lioah PDF nih an kan kah ahcun ThanTaung khua dirhmun cu voidang bantuk a si ti lai lo, hinak in a zual lai,” tiah SAC ralbawi nih a chim.
June 20 ah ThanTaung khua Sataih(စာတိုက်) zung pawng ah cheknak a tuahtu SAC ralkap cu, PDF nih Sniper in kan rak kah hna caah SAC ralkap Sergeant pakhat a rak thi, tiah ThanTaung PDF nih cathanh an chuah.
Kum 2021 a dongh lai ah ThanTaung -Bawkali(သံတောင်-ဘောဂလိ) khua hlatnak lam ah SAC ralkap cu atu le atu kah an tong i, bomb puahhnawh an tong lengmang.
Cu ruangah meng 16 sakhan um SAC ralkap bawi pakhat le a kuttang hna nih, OSitKung, Chaung Hna Khuah( ဥသျှစ်ကုန်း၊ ချောင်းနှစ်ခွ), meng 20 um khua le ThitSeTaung(သစ်စေးတောင်) khuami, biaknak hruaitu le khuanu khuapa hna cu an tlerh hna, tiah Taw Oo Karen News nih a langhter.
