Tuzing ah American nih Iran neuclear siamnak sehzung pathum a kah hnu ah Iran ram chung a um mi American rammi le ralkap vialte cu kan hmuitinh ( target) an si cang tiah Iran hruaitu lubik Ayatollah Ali Khamenei nih a thanh.
Iran le Israel buaibainak kong ah American aa rolh ve mi kong he pehtlai in Iran lubik nih nithumni ah khan ralrin a rak pek.
“Hi buaibainak ah American aa rolh ve a si cun remh than awk a tha lo mi rawhralnak a phan lai.” tiah a rak chim.
American president Donald Trump nih cun Israel he ttangti in Iran tuknak kan thok cang tiah a thanh ve.
“Iran ram i a um mi Fordow,Natanz le Esfahan hna cu kan kah i kan hlawh a tling.” Tiah Trump nih Truth social media ah a langhter.
American nih Iran a kah hnu in Israel nih cun a ram ah sianginn a khar ter hna pin ah mibu in um lo ding le a herh tuk mi rian dah ti lo zung pawl zong khar dingin nawl a chuah.
A tu i American nih Iran kah nak ah a hman mi vanlawng hna chung ah hin B-2 vanlawng aa tel i cu vanlawng cu GBU-57 Massive Ordnance Penetrator timi pounds 30,000 a phur kho mi vanlawng zong aa tel tiah theih a si.
