Arakan Army – AA nih ukhruainak a kalpi nak Paletwa ah tualchungmi nih ral an zam taak mi innlawng mi hna ah Rakhine in a rak i thial mi hna nih khua sak nak ah an hman tiah tualchungmi sinin theih a si.
A tubantuk in khua an sak mi cu inn ngeitu hna nih sian ruang le nawlpek ruangah si lo in AA nih an umter mi hna a si.
“kan inn ah hin Myauk U lei in a ra mi an um. um hlah uh kan ti ko hna nain AA nawl in an um ko. nan inn um nan duh lo cun AA sinah chim hna uh an kan ti. Inn dang hna zong ah an um cio hna. Kan zoh tik hna ah an um nak hi sau cang dawh a si.” tiah Paletwa khuapi Myoma sang a um mi nu pakhat nih Ayeyarwaddy Times ah a chim.
Paletwa peng chung ah hin SAC an um ti lo nain AA an um ruangah le SAC nih vanlei in kahdohnak a tuah tawn caah Paletwa ralzam hna cu khua ah an kir ngam rih lo.
Ramkhel a hun that deuh tikah khuami hna cu mah le inn cio ah kir in khuasak an duh te lai caah a tu bantuk innngeitu nawl loin AA nih duh paoh in khua an sak ter mi hna cu phungning lo khuasak a si tiah a chim.
“Kan ram a that deuh tikah cun kan inn cio ah kan kir than te ko la. Kan inn hi zeiti poah in kan kal tak mi a si hrimhrim lo. Tha tein kan hrenh ta hnu ah kan kal. A rem ah cun a rem ningin kan kal i kan va thenhhlimh. A tu ah cun kan inn ah midang an um. a tu kan dirhmun ningin an harsat ruangah kan an um ter mi hna a si ah cun ka theihthiam ko. a tu ah cun kan in ah an um i an duh mi chawleh nak hna an tuah.” tiah Paletwa peng, Htronai khuami pakhat nih a chim.
Rakhine in a ra mi hna nih cun inn chung khuasak tintuknak thilri vialte, bel le kheng, hni le puan hna cu an mah ta bantuk in duh poah in an hman tiah theih a si.
A tu ah Rakhine ram in Paletwa ah a rak i thial mi hi a thong leng an si cang i an duh paoh in khua an sa hna tiah theih a si.
Paletwa peng chung ah hin SAC le Arakan Army AA hna karlak kahdohnak a chuah hnu ah khuami thonghra leng cu Hakha,Naypyidaw,Yangon le India,Mizoram hna ah ral an zam hna.
