Arakan Army – AA ruang ah Paletwa telhin Chin ram thlanglei le SAC kut in a luat nak a si tiah Chin Brotherhood in chimphuannak nawlngeitu Salai Yaw Mang nih a chim.
Paletwa peng ah a um mi SAC sakhaan hna , Byuha sakhaan hna AA nih an rak laak lo ah cun Matupi,Mindat,Kanpetlet,Cindwe le Lailenpi hna ah hin SAC kan thenh kho hna hnga lo tiah Salai Yaw mang nih a chim tiah Western News nih a langhter.
“Paletwa i a um mi SAC sakhaan pawl,Byuha sakhaan pawl cu AA nih rak tu hlah seh law Chin ram khoika hmanh kan nih nih kan tu kho lai lo.Paletwa ah SAC um lo ding in AA nih an rak thenh lo ah cun Matupi a luat nak ding lam a um lo. Cindwe zong aluat lai lo.Mindat,Kanpetlet, Lailenpi tiin zeihmanh a luat kho lai lo.Paletwa ah SAC thazaang a thong thong in an um i a dang kahdohnak ah ralbawm tu 200,300 a thlah hna ah cun kan nih caah a har tuk cang. Chin ram mah vialte SAC kut in a luat mi hi a si kho hnga lo.” tiah a chim.
Paletwa khuapi cu AA nih an laak caah Chin Brotherhood nih a dang khuapi hna kan laak khawh nak a si tiah Salai Yaw Mang nih cun a chim.
Paletwa peng cu Arakan Army – AA nih 2024 January 14 ah khan SAC kut in a laak i cu hnu ah ukhruainak vialte a mah nih a kalpi hnu ah Paletwa peng cu Rakhine ramchung ah khumh in District pakhat ah chiah a timh tiah thawngpang a leng.
