Mandalay Aungmyetharsan peng chung ramdang chuahnak passport zung ah passport tuah ding in minung a thong leng an i tlar i tuzing February 19 zinglei slm 2 tluk ah mibupi nih nenh ruang ah Nu 2 an thi i 1 hliam a tuar tiah theih a si.
A thi mi hna hi Daw Khin Myo Aye kum 52 le Mah Khaing Wai kum 39 hna an si.kum 53 a si mi Daw Hte Hte Win zong mibupi nih an nenh caah hliam a tuar i Mandalay sizungpi ah tlikpi a si.
Ramdang chuahnak passport cauk chuah dingin mi a thong in an i tlar, mi an tam tuk caah thaw chuah kho ti lo in a thi le hliam an um hi a si.
“Tuzing hi nidang nak in mi an tam deuh,i tlar cio cu a si i mi an tam tuk caah an nenh hna caah nu pathum thawhchuah kho ti lo in an um caah sizun kan tlik pi hna,pahnih cu an thi pakhat bel sizung ah a um rih ko” tiah thil sinin theitu pakhat nih Zalen ah a chim.
Aluancia January 3 thok khan Mandalay Aungmyetharsan passport zung ah passport a rak i tuah mi hi nifatin minung 3000 tluk an si i SAC nih ralkap rian luh viar ding tiah thawng a thanh hnu in passport a tuah tu an tam chin lengmang tiah theih a si.
Yangon lawng ah ramdang kalnak passport cu Online in booking tuah khawh a si i ramkulh le ramthen dang hna ah cun mah pumpak va kal lawng ah booking tuah khawh a si tiah theih a si.
