Gangaw Peng a thlanglei le Kalay peng a chaklei i pyusawhtee khua 12 in tang 9 le tang 10 a kai cuahmah mi siangngakchia minung 200 tluk cu SAC nih Pyithusit special commando training a pek cuahmah hna tiah theih a si.
“Tang 9 le Tang 10 a kai lio mi siangngakchia pawl training an pek cuahmah hna,an training a dih in Kalay thlanglei kahdohnak ah thlah an timh hna tiah kan theih,Ngakchia hna caah tih a nung tuk hringhran” tiah Gangaw peng rianngeitu pakhat nih People’s Spring ah a chim.
SAC nih hin Gangaw peng chung Pyusawhtee khua hna a si mi Hantharwaddy,Kokka,Shwe Myitta,Nichuah Laygyi,Nitlak Laygyi,Winwah le Myaukhinyan khua hna le Kalay thlanglei Pyusawhtee khua 5 hna in mino hna cu February 29 thok in training a pek hna hi a si. Gangaw peng chung i pyusawhtee khua hna cu a luan cia February thla ah khan SAC nih meithal zun 500 a rak pek hna.
A tu ah a chuak cuahmah mi Kalay thlanglei kahdohnak zong ah Gangaw peng Pyusawhtee hna cu Sac nih ralram ah a thlah hna i kahdohnak ah an kal ter ve hna tiah theih a si.
Gangaw peng chung ah hin khua 100 leng a um i a cung langhter mi khua 7 lawng ah SAC nih ukhruainak a kal pi i khuadang vialte cu NUG runvennak zung nih tuanvo an laak viar.
