Chin ramkulh,Paletwa peng,Samee khua chung ah ralhrial dirhmun in a ummi minung (1000) tluk cu bawmhnak phaisa an i zat lo ruangah eidin lei harnak an tong tiah thawng theih a si.”Mizapi zawnruahnak in bawmhnak petu (NGO) phu hna nih SAC sinah phaisa pe in thlakhat ah ralhrial minung pakhat ah (30000) kyats in bawmhnak a pek tawn ko nain a tu ah thilman a kai tuk caah kan i za hrim lo” tiah ralhrialtu pakhat nih a chim.
“Samee khua chung ah facang tunkhat ah kyats (85000) a si,minung pakhat nih bawmhnak kan hmuh mi cu kyats (30000) a si tikah kan i za lo,a sikhawh ning poah in kan nung ko” tiah a chim chap.
October 13 tiang ah Samee khuachung thilman cheukhat hna mcu Zapi ei mi facang tun khat (85000)kyats,Family Care sahphiat tlangkhat (2000) kyats,Chiti cuaikhat (15000 ) kyats le khaichuansen cuaikhat (6000) kyats hna an si.
Samee khuachung ah ralhrial in a ummi chungkhar (324) an um,Pa (677) le Nu (766) an si i an zapi fonh ah minung (1446) an si.Cutin ralhrial in a ummi hna cu 2019-2020 lio ah Rakhine ralkap AA le SAC hna kar kahdoh nak ruang ah a rak zam mi an si hna.
