A tulio US president Donald Trump cu US President a sinak in ni 12 telawng ai duh cang. Asinain, nizaan nai US Capitol Hill buainak ruang ah Congress biacaihnak komiti Democrats phu nih Trump cu a rian hrimhrim in phuah siseh tiah an zalh cang.
Democrats lei nih Vice President Mike Pence sin ah ca an tial i, President Trump a rian phuah ding in an forh. Democrats lei nih an hal ning ah cun US Democracy limhang le muisam a hrawh ca ah a rian in phuah si ko seh tiah an forhfial.
US Phunghrampi a voi 25nak remh mi (25th Amendment) kha an sawhkhih i, rampi president nih vice president sin ah uknak kha chikhat ca siseh, caan sau ca siseh thlennawn khawh a si tiah ai tial.
US Phunghram 25th Amendment nih cun “President pakhat cu a rian kha a tuan khaawh ti lo ahcun asiloah pumsa le thinlung lei damlonak a ngeih ahcun Vice President kha President dirhmun ah phakter khawh a si tiah” nawl a pek.
Hi phunglam a cang 4nk zawn ah Vice President nih cozah upa tam-u hna i an duhnak le President nih a rian a tei ti lonak cathanh khawnak nawl zong a pek chap.
Democrats lei nih cathanh ning ahcun Congress le Senate lutlai hna nih min an thut ahcun Rampi president cu president si ding ah ai tlak ti lo ca ah a rian dinhter a si tiah cathanh an chuah khawh (Congress hruaitu cu Nancy Pelosi a si i, Senate hruaitu cu Mike Pence a si).
Hi zawn ahhin President nih phuahnak ca a tial khaw. Cu si lo ahcun Hluttaw nih bia an khiah lai tinak a si. President a rian in phuahnak ca ah Congress le Senate ah Thimfung cheuthum cheukhat nih an duh ahcun phuah khawh a si cang. Hi bantuk thil pawl an tuahttuan lio hin Vice President cu President dirhmun ah a dir kho cang.
A luancia October thla ah President COVID-19 a rak i chawnhbarh ahkhan 25th Amendment kong hi an rak caih ngaingai cang mi a si.
US Tuanbia Ah 25th Amendment Hi Ai Hmang Bal Maw?
US President hlun John F. Kendy thah a rak ton hnu kumli 1967 kum ahkhan 25th Amendment hi an rak chuahpi mi a si. President pakhat nih president rian a tuan khawh ti lo tikah a hodah a chawng lai timi bia a hung chuah hnu in hi phunghram hi an chuahpi i an fehter mi a si.
A luancia 2002 le 2007 kum ahkhan President W. Bush kha a pawpi cheknak ai tuah lio ah anaesthesia (mehsee) an rak pek i, hi lio ah 25th Amendment hi an rak hman bal. President Ronald Reagan zong kha 1985 kum ah cancer zawtnak operation a rak i tuah lio zong ah Vice President sin ah uknak a rak chiah bal ve.
US tuanbia ah 25th Amendment hi an rak hman ko nain a dongh tiang President rian in phuah mi cu ahohmanh an um rih lo.
Source: BBC
