US President Donald Trump tanhtu hna nih US Capitol chung ah lut in buainak an ser lio ah hliam hma a tong mi palik pakhat a thi tiah theih a si.
Cu ca ah hi buainak a forhtu a si mi President Trump cu President in phuah ding ah Democrats lei nih an hal cuahmah cang. Congress hruaitu Nancy Pelosi nih cun US phunghrampi dal 25 nak bantukin Preisident hi President rian tuan ding ah ai tlak lo tiah thanh ding ah a hal cang ti a si.
Hi kong he pehtlai in President Trump nih cun Hluttaw chung tiang buainak ser cu a poi taktak mi a si tiah a chim ve.
Nithum Ni ah a cang mi Capitol Hall buainak ruang ah a tlawmbik minung 5 an thi cang. Palik Officer Brian D. Sicknick cu doh-aunak a tuahtu hna hliam hma in nihin ah a thi tiah Palik lei nih thawng an thanh.
Relchap: US Ram Ah Democracy Ralhruang Ai Hninh Ni
A dang a thi mi hna lakah pakhat hi US thli ralkap hlun a si i, kum 45 nu a si. Ashli Babbitt tiah theih a si i, Palik nih an kah ruang ah a thi mi a si.
Capitol Hill buainak ruang ah Palik minung 14 hliam an tuar. Buainak kong he ai pehtlai in minung 68 cu tlaih an si cang tiah theih a si. Tlaih mi hna chung hin minung pakhat kut cung ah kut in ser mi bomb 11 le ralkap meithal arak i ken tiah palik nih an chim.
US Capitol Hill cu thirhling pe 7 sang mi in an kulh cang i, a tlawmbik ni 30 cu kulhkhar a si rih lai. Hi buainak ruang ah Trump hruai mi Security phu lei minung hna cu an rian in an i phuak cang tiah theih a si.
Source: BBC
