A ralaimi 2020 thimnak ah cun Fonhkomh Cozah (Coaliation Government) hmuh kan duh, a ruah zong kan i ruahchan tiah Kachin party a simi Kachin State People’s Party (KSPP)Vice Chairman-2 zong a si i, Sumrabum peng Pyituh Hluttaw Candidate zong a simi U Aung Hkam Gumrawng nih CBN ah a chim.
October 12 (Nizaan) CBN News biaruahnak ah U Aung Hkam nih a chimmi chungah tlangcung party hna an biapit nak kong le 2020 hnu lei thimnak ah tlangcung party hna nih lungrual tein fonhkomh ser in Federal phak khawhnak ah a biapi mi an si nak kong a chim.
“2010 thimnak ahkhan USDP nih teinak a hmuh. Tlangcung mi nih kan kong chimrel nak ca ah lung a si lo. NLD nih thlen caan a cu cang an hun ti ve nain tlangcung mi kong chimrel nak a um thiamthiam lo. 2015 lio bantukin Landslide teinak zong an hmu ti lailo. 2020 ah a biapi bikmi cu Tlangcung ramkulh party pawl fonhnak kong hi a si telai” tiah a chim.
Kachin mipi nih NLD hruaitu Daw Aung San suukyi an hmuhning kong he pehtlai in U Aung Hkam nih, “2015 hlan ahkhan Daw Aung San Suu Kyi hi Myitkyina ah a rak phan. Mipi sin ah pathum a rak kamh hna. Myit-sone tikham hi fianghlang in hluhchuah ka zuam lai, peace process kan thlen lai. 2008 phunghram kan thlen lai tiah a rak chim. Asinain, hi a chim mi pawl hi pakhat hmanh an hung cang taktak lo. Ai zuam ngai ve ko nain, a hlawh a tling lo. Hi ruang ahhin Kachin mipi an lung a dong.” tiah a chim.
Kachin ramkulh chungah mipi tthentthek nak kong ah mipi nih funtom an duhnak kong he pehtlai in, “Kachin mipi nih mah le cangcarei cio in um hi an duh lo. Cu ca ah Kachin mipi nih ramkhel party fonhnak ding ca ah rak khan a si. Mon ramkulh ah Boyoke Aung San hlei kong he Mon mipi an lung a rawk. Kayah ramkulh zong ah Aung San milem kong ah mipi nih funtomnak an hun ser. Cu ca ah hibantuk a cang mi ramkulh pawl ahhin NLD nih a tei than lai timi hi a har ngai mi a si” tiah U Aung Hkam nih CBN News ah a chim.
KSPP Party timi hi KDP (Kachin Democratic Party), KSDP (Kachin State Democratic Party) le KNCD (Kachin State National Congress for Democracy) hna i fonh in 2020 thimnak ah Kachin ramkulh ah hmunhma la ngai in a hung dirmi ramkhel party an si. 2015 lio ahkhan fonh an rak i tim nain an hlawh a rak tling lo. Asinain2020 ah cun, Kachin National Consultative Assembly (WMR) hruainak in biaknak, mino le nubu, NGO le CSO pawl telpi nak he an rak i fonh kho.
KSPP hi 2010 ah an rak dirhmi a si i, a tu ah cun ramkhel party paruk ai fonhnak ah a cang cang. KSPP party a tulio Chairman hi Dr. Manam Tu Ja a si. The Kachin State People Party (KSPP) hi 2020 thimnak ah thutnak 68 he ai zuam ding Kachin party a si.
