Hmakhat lo ah topic kan rel tikah nihchuak le a sawhsawh a lo lomei? Laitlang ah a chuak lo i, ramdang ah a chuakmi hngakchia, khuapi innchung tang ah a tthang lian mi hna ca ah cun nihchuak a lo lem lailo.
Tuluk nih zabu 14 hrawng thawk khan vawleicung ah toilet paper a rak hmang cangmi an rak si. Asinain, nitlak ram pawl ahkhan zabu 18 hrawng lawng ah toilet paper pawl hi an chuah i, hman a si tiah ruah a si.
Minung khuasaknak ah zun-ek hi a biapi ngaimi thil ah a can ve tikah a hlan lio ah tawpherh hnawh tikah zeidah an rak hman cio hna timi kan zoh cio tuah hna lai.
Kawmfo
Lailei nih cun hmakhat te ah ruah hmasa bik mi le mitthlam ah cuanter khawh bik tawpherh hnawhnak asi (hehe). Hi bang in zabu 17 hrawng zong ahkhan US ram i, ramngeitu miphun pawl le Ramteitu (Colonist) pawl nih hin kawmfo hi tawpherh hnawhnak an rak hman ve ko ti a si. Kawmfo an i thimnak a ruang bik cu Kawmfang thlingh hnu ah a tangmi kawmfo a pharmi khi thil dang nakin an neem deuh i, hnawh tikah a tluangtlam ngai in an theih ca ah zapi hman in an hmannak le an duh nak a si ti a si. A thiang duh khun (hehe). Lai tawpherh hnawhnak timi kha a rak si lemlo. Mirang tawpherh hnawhnak zong a si ve ko ti a si ko rua hih.
Vur/Horha
A kihnak hmun ah khuasa mi ram le minung pawl nih hin an ram ah horha a tamtuk tikah horha zong hi tawpherh hnawhnak ah an hman ve ko ti a si. Asinain, horha in hnawh a thatlonak cu a kik tuk ti a si. Asinain, nifatin in hman ahcun neek a um ve thiam ko ti a si. A mak ngai mi cu horha in tawpherh hnawh hi hrik le rungrul ca ah a thiang duh ngai ti a si.
Lung
Lung in tawpherh hnawh hi vawleicung ah a hlun bik tawpherh hnawh phun a si tiah an chim. A hlan lio pi chan ah cun mi pawl nih hin an tawpherh thianhnak ding ca ah an mah he ai lam naih bik thil pawl in an i hnawt ko ti a si. Asinain, chantar ca ah cun lung tawpherh hnawh cu ruah siarem lo ngai a si ve. Lai lei hoi ahcun lung tawlpherh hnawh cu tawka hmaat nak a si tiah an rak ti tthheo.
Funghreu
A luancia kum 2000 hrawng ahkhan Tuluk pawl nih hin rua in an tuahmi tawpherh hnawh funghreu hi a rak um ti a si. Cucu an nih nih Salaka, Cachou le chugi an ti ti a si. Ruahreu a par lei kha puanchia in an rak tuam i, cucu tawpherh hnawhnak hman ttha ngai a si an ti.
Umbeu
Hlan lio Greece pupa pawl zong hi “pessoi” tiah an kawh mi umbeu pawl hi tawpherh hnawhnak an an hman ti a si. Hi pessoi pawl hi a hlan lio Mediterranian chan zunput khur pawl ah hmuh khawh a si rih an ti. Hi ruang ahhin Greek pawl zong nih hin phungthluk an ngeih mi , “lung savo vothum hi tawpherh hnawhnak ah a za” hi a si lai tiah an ruah.
Cicua Heng
Zumh awk cu a har colh ngai. Cicua heng ngai in tawpherh van i hnawh cu lelpan ngaingai a lo nain, rilikam ah khua a sa mi pawl hna cu an hman taktak ko ti a si. An nih Cicua pawl hi Lai cicua ngaingai nak cun tawpherh hnawhnak ah muisam ngeih deuh dawh in an um. Vansan taktak ah a si ko rua.
Caku
Catlap sernak hramthawk hnu hin cun tawpherh hnawh chankhat a hung i thleng ti awk a si. Zabu 18 hnu cun Tadinca le magazine pawl an hung chuak cang. Tadinca hi rel lo zong ah tawpherh hnawhnak ca ah cun ngeih cio a rak si. Asinain, Lailei ahcun tadinca cu cakuak zualnak ah a rak ttha tuk ve fawn.
Thinghnah
Thinghnah hi ramtang ah cun a fawi bikmi tawpherh hnawhnak a si ti khawh a si. Cun, a thian zong a thiang ngai fawn mi tawpherh hnawhnak phunkhat ah aa tel. Cu ca ah ramtang kal ah thinghnah le funghreu ah thinghnah hi i thim deuh ding a si ti a si.
Ti
India, Africa le Arab ram mi pawl hna nih nunphung bantukin an i ngeihmi cu na tawpherh nai hnawh tikah na kehlei in ti in a hnulei ah na hnawh lai timi phung an ngei. Hi phung hi vawleicung ah hman tam ngaingai a si ri ko. A bikin, Asia ram zong ah a si rih ko. Laitlang ah Laimi zong nih Ti hi kan hman mi tawpherh hnawhnak a si ko. Funghreu le kawmfo kaltak kholo phu zong cu an um ko rih rua. Tuanbia hlathlai tu pawl zong nih minung kan orhlei in kan kut kan i tlaihmi zong hi kehlei in tawpherh kan i hnawh ca ah a si lai tiah an ruahdam.
These
Khuacaan le vawlei umtuning nih kan pawngkam a dan ter cio. These ramcar um pawl hna ca ah these le vuidip hi tawpherh hnawhnak a si zong hi ruah ngaingai ahcun khuaruah har awk a si theng hnga lo. Nang le kei teh, lungthiang tein i hal usihlaw thim awk lam a um bak lomi tawpherh hnawh a hauh caan ah: ZEIDAH NA HMAN? A biapi cu pum ngandamnak dawn lo tu tawpherh hnawhnak a si kha a si ko rua.
Theihternak: CBN Nih Lifestyle kong kan tial tikah News he aa lo loin cabia tete an um tikah careltu lila nih kan theihthiam piak hram ulaw, a thurhnawm lo bik in tial khawh kan i zuam lengmang_Editor
