Rakhine ramkulh pengkulh pakua, Shan ramkulh pengkulh paruk telh in ramkulh ramtthen paruk ah thimnak tuah khawh lo nak ding hmun pawl cu UEC nih October 16 ahkhan a thanh.
Hi kong he pehtlai in a tulio ah UEC khuakhan nak hi fak ngaingai in ramchung soisel a tong cang. UEC nih dik lo ningin rian a ttuan, NLD nih a tei lonak ding hmun paohpaoh thimnak tuah lo ai tim tiah fak ngaingai in soisel a hun i huah cang.
SNLD Party Sai Nyunt Lwin nih cun
Rakhine ramkulh chungah peng 9 aa tel. Hi pengkulh pakua hi a hlan ah thimnak tuah khawh nak hmun an si ko. Cung leng ah Shan ramkulh Mai-kang zong aa tel fawn. A tak ti ah cun Mai-kang khua ah zeihmanh a cang lo. Mai-kang ah thimnak ai cuh ding party paruk kan um. Zei party hmanh nih thimnak a dik lo, kan thawnpiak u timi a um lo. Raltuknak zong a um lo. Chim ko ah cun Naypyidaw nakin a him deuh
tiah a chim. SNLD party chungin palai minung pathum cu thimnak ah aa tel kho ti ding an si lo.
Mai-kang ah NLD nih a tei kho hrimhrim lo. A tei khawh bak lo nak hmun a si. SNLD nih kan tei nak ding hmun bak a si. Cucu fiangtlar in chim khawh mi a si. A tu Mai-kang kong hi UEC Mai-kang zong nih an hngalh lo mi a si. Anmah zong nih UEC pi ah an chim mi a um lo. UEC zong nih an hal hna lo
tiah a chimchap.
A dang pakhat khuaruahhar tak a si mi cu zeiruang ah dah Paletwa hi thimnak tuah a si lai ti mi hi a si. Rakhine ramkulh peng 9 chung ah thimnak tuah lo ding thanh i Paletwa thimnak tuah ding hi khuaruah har taktak awk a si. Mipi hrimnak kong he pehtlai in thimnak tuah lo ding a si ahcun Yangon khi a him bak lo mi a si. Nikhat ah COVID positive minung 1000 leng hmuh nak a si. Minung a sawm in an thi fawn.
A dang hun chim than ahcun a tu UEC nih thimnak tuah lo ding a ti mi hna hi Tlangcung mi hna hmunhma lawngte a si. Chin le Kayah telh loin. Ramthen ah Pegu lawng aa tel. A tu Pegu Swe Kyin, Kyaukkyi timi khi Karen miphun pawl umnak a si. A huap in chim ahcun tlangcung miphun pawl umnak paoh ah thimnak a khar. A bik in tlangcung miphun pawl thimfung pek nak nawl an sung dih.
tiah SNLD party Vice Chairman Sai Nyunt Lwin nih a chim.
