Myanmar ramchung ah dothlennak a tuah tu phu dihlak nih mah le hmunhma cio i a ummi ralhraang sakhaan hna le ralhraang he aa pehtlai mi hmun kip hna cu hmakhat te ah do tti ding in nihin October 31 ah forhfial nak caa an chuah.
Chaklei Unau Ttangti phu (3) hna nih operation 1027 an thok October 27 in nihin October 31 tiang ni 5 chung kahdoh nak ah an i tinh mi hmunpi a si mi Chin Shwe Haw le Hpasai khua hna cu an laak leng ah Tingni khua zong an tlaih rih tiah theih a si.
Operation 1027 thok a si in cheukhat dothlennak phu hna nih kahdoh nak an thok colh ve bantuk in a taang mi dothlennak tuahtu phu hna zong nih atu bantuk a hmuh a har mi caan tha cu hmang in mah le hmunhma cio tuan vo laa in ralhraang hna sakhan le hmunhma hna cu do cio ding in forhfial nak an tuah hi a si.
Ralhraang hna nih vulei in ralhraang thazaang a chap khawh ti lo caah vanlei in riahcaw le hriam nam hna a chanh hna leng ah Jet Fighter le Mi-35 raltuk nak vanlawng hna hmang in a bawmh hna i kahdoh nak a um lo nak hmun zong ah vanlei in bomb a tlak. Nihin October 31 zaanlei slm 3:00 tluk khan ithok in KIO hmunpi a umnak Laiza khua pawngkam ah Jet Fighter in bomb lung (5) a thlak i a thi le hliam kong bel theih a si rih lo.
