Chin ramkulh,Paletwa peng ah Bangladesh ram khuasa Rakhine miphun hna khuasa dingin AA nih timhlamhnak an ngeih i Paletwa khuami hna cu a herh mi poah an tuah ter hna tiah thawng kan theih.
Paletwa peng Miza khuate ah Bangladest in Rakhine miphun indawng 1000 tluk an rak i thial khawh nak ding ah khuami hna cu inn khat ah rua kung 1000 cio chuah pi ding tiah AA nih cun nawl an chuah.
“Bangladesh ram um mi Rakhine pawl khuasak nak ding caah rua an kan hau ter.inn khat ah rua kung 1000 cio an ti.khua lian deuh hna ah cun inn khat ah ruakung 2000 cio an ti.a rak lut dingmi hi fiang cun kan thei lo i a cheu nih indawng 600 an ti a cheu nih indawng 1000 an si lai an ti ve” tiah khuami pakhat nih a chim.
Rua kung pawl hna cu April thla chung ah khan hau viar ding ti a si i May 3 ah a hnu bik AA sin ah ap viar ding tiah nawl an chuah.
Hi kong he pehtlai in Paletwa peng zatlangbu lei a cawlcang mi pakhat nih “ Hi thawng hi a hman ko, Rakhine mi thar um nak ding ah Paletwa khuami hna cu thing le rua an sam/hau ter hna” tiah a chim ve.
Paletwa peng chung Miza,Shinletwa le Kyi-Lay khuate hna ah a luancia April thla chung ah khan AA nih meeting an auh hna i pa kum 18 – 40 karlak poah poah AA ralkap ah nan lut viar lai tiah an rak ti hna caah Mizoram lei a zam mi zong an tam ngai ngai tiah kan theih.
