Shan ram chaklei ah Pehzul in kalpi cuahmah a si mi operation 1027 a nihra nak nihin November 5 tiangah ralhraang hna sakhaan 120 leng,Tank raltuknak,Hriamngan kahnak hna,14.5 vanlawng kahnak meithal hna le kuanzen tampi hna kan laak tiah nihin ah thawng an thanh.
Hriamnam an laak mi dihlak zeizat a si ti cu fiang tein an langter lo nain 14.5 vanlawng kahnak meithal cu a tulio anmah ralhraang raltuknak tilawng cung ah an chiah vi pawl a si tiah MNDAA in chimphuannak nawl ngeitu Li Gya Win nih a chim.
Chaklei unau ttangti phu thum nih thawng an thanh ning ah ralhraang sakhaan laak mi hi 120 leng an ti i a tak in an laak mi hi ralhraang hna sakhan le palek sakhaan a zapi fonh ah 141 a si tiah theih a si. MNDAA le AA an laak mi lawng ah 109 a si i TNLA nih an laak mi zapi 32 a si caah ralhraang sakhan laak mi zapi hi 141 a si tiah theih a si.
