SAC ralbawizik a si mi Min Aung Hlaing cu a riang chuah tak ding in le cu a riang cu a mah changtu Soe Win sin ah ap ding in Mahbahtah phungki hna le an mah SAC tha a pe tu hna nih January 16 i Pyin Oo Lwin ah lam zawhnak an ngeih nak ah an hal tiah theih a si.
Shan ram chaklei kahdohnak ah MNDAA ralkap pakhat nih Kawl pura sobul in a den mi kong tlangtaar in duhlonak an langhter mi a si i Mahbahtah hruaitu minthang hna an itel.Mahbahtah timi cu Kawl phungki hna nih Thein Sein cozah chan ah Islam biaknak doh ding in an rak dirh mi phu a si.
Pyin Oo Lwin i an tuah mi lam zawh nak ah cun kum 37 a si mi Ariyawontha timi Pauk phungki sianginn ah a thu mi pa nih donhhlei cung in bia a chim nak ah Min Aung Hlaing cu ralkap lei tuanvo a laak mi a rian cu chuah tak seh law civil uknak lei ah i thleng seh tiah a hal.
“Senior General Min Aung Hlaing cu ral lei si lo in cozah department pakhat khat ah rian pek ah a tha ko lo maw” tiah a chim hi a si i donhhlei tang a um mi hna nih cun “a tha ko” tiah an leh ve.Hi kong he pehtlai in thong an ka thlak ding a sic un thong thlak ding in timhcia ka si ko a ti chap.
Cu lam zawh nak ah cun ralkap pension hna,USDP party hna,khuanu khuapa hna le SAC a ttanh tu hna an zapi minung 3,200 an si tiah SAC ttanh tu Telegram cheukhat nih an langhter.
2021 Uknak a laak sin in kum thum tluk a rauh tiang ah hin tlangcung hriamtlai le dothlennak a tuahtu phu hna an thazaang a thawng chin lengmang i kan hnu le te ah khan Min Aung Hlaing hruaimi ralkap hna cu an sakhaan le Khuapi tam ngai an sung.an sungh mi khuapi chung hna ah cun SAC caah phaisa tampi hmuhnak a si mi khuapi cheukhat an itel tiah theih a si.
Cu kong he pehtlai in mahbahtah hna nih cun Min Aung Hlaing cu a zia a tha mi minung a si tiin bianek an thlaih.cu ti a si kun ah Min Aung Hlaing hmunhma cu a ho dah a laa lai an ti tik ah amah chang tu Soe Win a um ko cu ta tiah leh nak an tuah hna.
Pauk Phungki pha hi Mahbahtah hruai tu U Wirahtu i hnuzul a si i kha hlan zong ah NLD cozah duhlo nak,Islam biaknak duhlonak,ti bantuk ruang ah thong a rak tla mi a si i kawl mi phun a ttanh tuk leng ah Buddish biaknak hi kawlram pumpi biaknak ah cang ding in saduh a that tu a si.
SAC lei nih January 17 thawng an zamh nak ah Pyin Oo Lwin ah SAC tanhtu phu hna nih lam zawh nak an ngeih kong an tial ko nain Min Aung Hlaing a rian chuah tak ding in an hal mi kong bel an tial chih lo.
