Mandalay ramthen,Madaya peng chung ah SAC ralhraang hna nih ralhrial minung 6 le tualchung mi mizapi minung 13 an zapi minung 19 an thah hna tiah theih a si.
November 18 zinglei sang ah Madaya peng nichuah lei Tha-yet-Kaing khuate pawng ah ralhraang nih an thah mi hna ralhrial pa minung 6 ruak an char tiah theih a si.Cutin thah a tong mi hna cu Madaya peng Kin khuate le Tha-yet-kaing khuate in ralhrial mi pa minung 6 an si i November 17 ah SAC ralhraang nih an tlaih hna i an kalpi hna hnu ah a tu bantuk in November 18 ah an ruak in an char hna hi a si.
“Tha-yet-kaing lei ah ralhrial ding in an rat lio ah SAC ralhraang pawl he lampi ah an i tong i an tlaih mi hna a si.bia hal nak zong tuah ti lo in an meithal in an kah hna i an thah hna hi a si” tiah Madaya pah-kah-phah in chimphuan nak nawl ngei tu nih a chim.
November 16 lio zong ah khan Madaya peng Aung-Kan-Tha khua lakphakti dawr cu SAC ralhraang nih hram hram in an kah hna caah tualchung mizapi minung 11 an rak thi. Cu hnu ah ralhraang hna nih lam a kal lio mi pakhat le Pat-Le-In khuami pakhat cu an kah thah ve hna caah cu ni lawng ah an kahthah mi hna hi minung 13 ans i. Cu tin ralhraang nih November 16 le 17 ah tualchung mizapi minung 19 an thah hna hi a si.
