Sagaing ramthen,Kalin khuapi cu tualchung hriamtlai phu hna nih Ni li chung an doh hnu tuzing November 6 zinglei ah tlamtling in an laak khawh cang tiah thawng theih a si.
November 3 zinglei slm 4 ah PDF le tualchung hriamtlai phu hna ibawm in kawlin khuapi laak kahdoh nak cu an thok i November 5 zanlei sang ah kawlin palek sakhaan an laak khawh i tuzing November 6 zinglei sang ah zipeng zung telh in kawlin khaupi cu tlamtling tein an laak khawh.
Nizan November 5 Kawlin palek sakhan laak kahdoh nak ah ralhraang nih hriam an chiah duh lo caah an doh hna i ruak tampi le meithal zun 45 nak tlawmlo an laak,tuzing zipeng zung ah hmunkhuar mi ralhraang hna cu puanraang an zuar i hriam an chiah tiah theih a si. Hi hna chung ah a tli zam mi zong an um tiah theih a si .
Kawlin khuachung kahdoh nak ah ralhraang lei nih hriamngan le vanlei in kahdoh nak a tuah peng ve caah tualchung hriamtlai zong a thi mi an um ve nain kaphnih kar a thi mi zat bel a fiang rih lo.
Kawlin khua palek sakhaan laak nak ah ramkhel ruang ah thong a tla mi hna cu him tein kan chanhchuah khawh hna i khuachung ah aa tap mi mizapi zong kan si khawh chung in kan chanhchuah hna lai tiah Kawlin Revolution –KR Team nih an thanh.
Kawlin khua cu ralhraang nih mei le phone line vialte an phih viar i Mi-35,Jet Fighter le hriamngan hna hmangin mizapi umnak khuachung ah kahdoh nak an tuah.Nizan November 5 lawng ah vanlei in kahdoh nak voi 20 leng a tuah tiah theih a si.
Cutin ralhraang nih duhpoh meithal an kah ruang le vanlei in kahdoh nak an tuah ruang ah tualchung mizapi a thi mi an um nain a thi mi zat bel a fiang rih lo.
