Laimi tampi khuasak nak Kalaymyo ah SAC ralhraang nih hramhram in ralkap tlakter awk ah mino a tlaih lengmang rih hna i kha hlan nak in a zual chin pin ah phaisa in tlanh tthan khawh a si ti lo.
Tu thla June 19,Aung San Su Kyi chuahcamtuak lai hrawng ah khan mino tlaih a tam ngai i zarh khat ah a tlawm bik mino 30 tluk tlaih an tong tiah Kalaymyo i SAC umkalning a hlathlai tawn tu nih a chim.
“Daw Aung San Su Kyi chuahcam lai hrawng khan aa thok i cu hnu cun mino tlaihkhih an hmang chin chin.Chinlung an chuih nak zong an an tlaih ko hna.zarhkhat chung ah tlaih a tong mi hi 30 in 40 kar an si. a biapi cu palik nih motor pathum li in an i chawk i an tlaih hna. an tlaih khawh hna hnu hin Suhpawngzung an an kalpi hmasa hna. cun ralkap sizung ihkhun 100 umnak ah sii lei cheknak an ngei. Cu ti cheknak ah cun a ngandamnak nih a tlinh lo tiah phaisa ting 20 tluk pek ah cun a ngah tawn.” tiah Khonumthung ah a chim.
SAC ralhraang hna cu Kalaymyo khuapi chungah an i chawk i car gate, rian hmun , zu dawr le rawl dawr tibantuk tiang luh hnawh in mi an tlaih hna.
“ka bochan ngai ngai mi ka fapa hi kan hnu thla ah khan rian in a lawi pah ah an tlaih. Kan theih le cangka phaisa ting 30 kan pek hna i kan thlah ko lai an ti. A hnu zong ah phaisa an kan hal than mi a um len i phaisa tampi in tlanh kan timh nain an thlah hleilo. SAC vanlawng a rat in Shan ram lei ah an kuat diam.” tiah a fa tlaih a tong mi pakhat nih a chim ve.
June thla thok zong ah khan Kalaymyo, Nyaungpinthar sang i SAC riankhinh mi sangukbawi i a naupa zong tlaihkhih a tong i phaisa in tlanh an timh nain a mah ai ah minung an um lo ah cun a ngah lo tiah an rak ti hna.
A tu lio cu Kalaymyo ah zeibantuk kahdohnak hmanh a um lo nain SAC nih hriampi a kah lengmanh pin ah kha hlan nak in humhimnak an laak dan a ttha deuh tiah theih a si.
