India- Myanmar Ramri Tio SAC Ralhrang Camp In Palek 4 An Zam
Chin ramkulh, Falam peng, Rihkhawdar Block-2 (Tio) cung ah ummi Ralhrang camp in palek 4 hna cu March 6 ahkhan hriamnam ken loin Chin ralkap hna sin ah an va dor/ zam tiah theih a si.
Hi Palek 4 hna hi kanhnu thla Febuary 26 ah Falam khua in Helicopter in an van phurh hna i Tio ah an chiahmi hna an si. Falam in an rak rat lio ah hriamnam an i ken lo i Tio an phanh hnu ah hriamnam an pek hna.
Chin ralkap sin ah a zammi Palek 4 hna cu, Kam Neih Pau, Lal Tial Thang le Thang Cuan Mang le Duh-tatkyat Tuan Pau Pian hna an si.
Mah Miphun hawi he i kah kan duhlo an ti caah Khuachungni rian an fial hna lio ah Civil thuam in India ram lei ah an zaam i Chin ralkap hna nih an mah he an chungkhar he a himnak hmun ah an chiah cang hna.
March 5 zingka ah Chin ralkap hna nih Rihkhawdar, Tio kam tlangcung ummi ralhrang camp cu an rak kah hna i ralhrang 8 an rak thi.
