Chin ramkulh,Falam peng ah kaphnihkar buaibainak a linsa cuahmah mi CNO/CNDF le CNF/A karlak ah remdaihnak a um khawh nakhnga Mizoram cozah nih tlaangtlak in a tawlrel cuahmah i CNF/A lei nih kan duh nak tete zong Mizoram cozah sinah kan chim cang tiah CNF/A chimphuannnak nawl ngeitu Salai Htet Ni nih Chin World ah a chim.
“Atulio Falam peng chung hmun zeizat ah dah hmun kan khuar timi cu fiangin ka theih kho ve lo. Hmun kan khuar a si hmanhah caan karlak ca lawng a si. kan zapi in fiangfai tein biaruah kan duh. Dothlennak caan chungah khat le khat buaibainak a um lo ding lawng kan duh. A hramthok te in kan mah lei nih cun mah le um ning cio tein um uh tihi kan duh peng mi a si.a tu ah Mizoram cozah nih an kan tlaangtlak cuahmah i kan duh ning zong kan chimh. A tu bantuk in khat le khat kar ah buaibainak a um caah ah cun hibantuk thil a can hi a phung a si ko. kan dirhmun zohchih in a hlan kan um ning tein um khawh hi kan duh mi a si ko.” tiah a chim.
Falam peng chung ah hin a hlan te in HPO/CDF-Hualngoram le CNO/CNDF karlak ah hmunram kong buaibainak a rak um i 2025 July thlathok khan khat le khat kahdohnak tiang a chuah hi a si.
Falam khuami pakhat nih cun “A hlan te in khat le khat karlak ah i hmuhthiamlonak a um cang mi cung ah CNF an rak i rawlh ve caah a buai ngai.CNO head quarters le IB 268 in an laak mi hriampi zong CNF/A nih an laak timi thawngpang hna a van thang ngai i khat le khat buaibainak a sang chin kho men. Mizoram cozah lawng siloin Chin ram biaknak lei upa zong nih khat le khat remdaihnak ah i teltum ve hna seh law ka duh ngai.” Tiah a chim ve.
Kan hnu July 2 thok khan Chinland Council chungtel HPO/CDF-Hualngoram umnak Rihkhawdar khua cu CNO/CNDF nih an rak tuk caah khat le khat karlak ah buaibainak alinsa ngai i July 5 ah Rihkhawdar khuapi cu CNO/CNDF nih an rak laak.
Cu hnu ah CNF/A le ttangti hna nih CNO/CNDF headquarters an laak ve i July 11 ah Rihkhawdar cu CNO/CNDF nih an chuahtaak tthan i a tu tiang khat le khat kar buaibainak a linhsat hi a si.
