Chin ramkulh ah EAO,peng aiawh le tlang aiawh dothlennak phu 18 telh in rak dirh mi Chinland Joint Defense Committee –CJDC cu hrawh a si cang tiah theih a si.
CJDC ah hin tlangcung hriamtlai EAO in Chin National Army (CNA),Peng aiawh in dothlennak phu phu 9,tlang aiawh in phu 7 le CDF KKG tiin phu 18 an i tel i 2021 August thla ah rak dirh mi a si.
Cu chungtel hna nih 2023 December 15 le 16 ah nihnih chung meeting an tuah hnu ah CJDC cu meeting bikhiahnak ning in an hrawh hi a si.hi meeting ah chungtel a si mi CDF Daai an itel kho lo tiah kan theih.
“CJDC an hrawh timi cu thawngdik a si ko.Chinland council a chuah cang caah chinland constitution ningin chinland cozah a dir lai,cu chinland cozah tang ah Ministry of defense a um lai,chinland phunhram pi ning in cozah pakhat tang ah cun ralkap bu pakhat lawng um ding a si caah CJDC cu a herh ti lo i kan hrawh mi a si,CJDC chungtel chung in phu 14 cu chinland council ah an itel i aa tel kho rih lo mi zong kan um hna” tiah CJDC in rian ngeitu pakhat nih Zalen ah a chim.
CJDC dirh a si in special commando phu rak dirh a si i CJDC kalpi nak in laiva operation,Timit operation,Tibual operation,Thantlang operation le a dang dang zong ah operation rak kal pi a si.2022 lio ah NUG nih CJDC caah ti in meithal zun 100 pek mi cu CJDC chungtel hna nih an va laak i an kir lei lam tantim Yinpaungtaing khua an phak ah SAC nih an rak tuk hna caah CAN in pakhat,CNDF in pakhat,CDF Mindat in pakhat le CDF KKG in pakhat nih ram le miphun caah nunnak an rak pek.
2023 January thla ah CJDC special commando phu cu caan karlak an hrawh i meithal hna cu an rak ithen phaw hna.cu meithal hna cu CNF nih zun 9,peng aiawh phu khat cio nih zun 6 cio le tlang aiawh phu hna nih zun 3 cio ah an ithen phaw hna tiah theih a si.
