Chin dothlennak hriamtlai phu hna karlak ah lungrualnak le funtom nak an duh caah Chin ram chung i tlaih hruainak ah a saang bik a si mi Chinland Council ah Chin National Front CNF aiawh in teltum nak cu a zatceo deng tthumh a si.
June 10 le 11 hna ah khan Chinlung khuapi ah Chinland Council hruaitu upa hna meeting an tuah i Chinland Constitution 2023 cu remh,hrawh le belh nak an tuah tiah theih a si.
“Section 26 khi kan zoh ah cun a lan ah Council aiawhtu minung 140 a si lai tiah rikhiah a rak si i MP chungin 27,CNF EAO in 27,Pengtlang le hmunram aiawh in 86 tiin kan rak khiah. Cuka ah CNF aiawh an tam tuk tiin chimceih a tam tuk caah CNF hruaitu hna cu tha tein kan ton hna.zei ti a si poah ah 27 in 15 tiang tthumh ah a tha ko lai ti a si caah CNF teltum nak cu minung 15 ah kan thlak. Cucu Chin ram ah lungrualnak a um khawh nak hnga caah kan tuah mi a si.” tiah Chinland Council Vice Chairman Salai Bawi Kung nih a chim.
Chinland Council dirhnak ah hin MP aiawh, CNF aiawh le Pengtlang aiawh tiin rak dirh a si i culak ah CNF nih aiawh 27 an rak thlah mi cu a tam tuk, 2008 constitution he aa khat tiah Chin miphun hna karlak ah elhniarnak tete a um pah i Chinland Council ah CNF teltum nak cu 19% a rak si.
A tu ah a thar in Siamremh than Chinland Constitution section 26 chungin Pengkomh le hmunram kongah phunthum in then a si kong, Pengkomh timi chung ah a hlan i a rak um mi pengkomh 9 a si i hmunram timi cu dothlennak hnu ah ukhruainak kalpi nak hmunram pawl kha a sawh duh mi a si.
“pengkomh le hmunram tiah kan ti tikah hin pengkomh timi cu a hlan i a rak um cia mi peng 9 kha a si. hmunram timi cu dothlennak hnu ah hriamtlai phu nih ukhruainak an kalpi nak hmunram pawl kha a si. tahchunnak ah Hnaring a si ah cun Lautu hmunram, Rezua a si ah cun Zotung hmunram, Lailenpi a si ah cun Mara hmunram tiin hmunram aiawh tu kan chiah ve hna.hmunram a ngei lo mi pengkomh hna an um rih i cucu Mindat, Kanpetlet le Paletwa hna an si.Hmunram a ngeimi pengkomh hna cu tahchunhnak ah Matupi pengkomh, Zotung hmunram,le Mara hmunram, Thantlang pengkomh a si ah cun Zophei,Lautu,Mara tibantuk, Hakha pengkomh a si ah cun Senthang hmunram tibantuk an si hna. Cu caah hmunram a ngei rih lo mi pengkomh in aiawh tu minung 8 kan chiah hna, aiawh tu a ngei mi Thantlang tibantuk nih aiawh tu minung 5 an ngeih i hmunram pakhat in aiawh tu minung 3 kan chiah hna.” tiah Salai Bawi Kung nih cun a chim.
Kalay-Kabaw-Gangaw hrawngah a cawlcang ve mi CDF-KKG zong hmailei ruahchannak he Chinland Council ah aiawhtu minung 8 pek a si ve.
Chinland Council le ICNCC hna i funtom khawh nak ding ah Chin National Counstitution draft tial ding committee kan tuah lai tiah Chin Brotherhood nih June 18 ah an chim.
Mizoram Chief Minister Pu Lalduhoma hruainak in Advocacy Team le CC,ICNCC aiawhtu minung 27 cio nih Chin National Constitution a hran tial ding in timhlamh a si.
Cuka in biaruahnak le hnatlaknak hna zohchih in Chin National Council – CNC dirh a si te lai.
A tu ah Chinland Council le Chinland Cozah, ICNCC le Chin brotherhood tiin phu hnih ah an i then i i funtom than khawh nak dingah tawlrel cuahmah a si.
