2024 May 18 in 24 karlak zarhkhat chungah SAC ralhraang nih ukpen mi khuapi 3 le SAC sakhaan 11 cu dothlennak ralkap nih an laak tiah Burma Affairs & Conflict Study (BACS) nih May 28 ah an thanh.
Dothlennak ralkap hna nih an laak mi khuapi hna cu Chin National Army – CNA le Chinland Defense Force – CDFs ttangpi phu hna nih an laak mi Tonzang khuapi,Cikha khuapi le Rakhine ralkap AA nih an laak mi Buthidaung khua hna an si.
Dothlennak aa thok in SAC sakhaan laak piak mi a tam cem nak cu Rakhine ramkulh ah a si i a changtu ah Kachin ramkulh ah a si tiah an langhter.
May 18 in 24 tiang zarhkhat chung ah hin SAC le dothlennak ralkap ttangti phu hna karlak ah kahdohnak voi 100 leng a chuak i SAC ralhraang nih Van lawng hmangin Chin ramkulh kahdohnak voi 7, Sagaing ramthen ah voi 2, Kachin ramkulh ah Voi 12,Rakhine ramkulh ah voi 9 le Taninthary ramthen,Mon ramkulh,Shan ram le Karen ramkulh hna ah voi khat cio a zapi voi 34 a tuah.
Kaphnih kar kahdohnak chungah tualchung ngakchia 4,Nu 12 telhin minung 46 nunnak aliam i zapi inn 200 leng a rawk tiah theih a si.
