Peng Pali Chung A Um Mi Daai Phun Tengnge Hna I Funtom Khawh Nak Dingah Chinland Council Chuntel Sinak In Kan Chuak Tiah CDF-Daai Nih An Thanh

Abraham Thang

Chin ram thlanglei,Mindat,Matupi,Kanpetlet le Paletwa peng chung hna ah a um mi Daai Phun Tengnge hna funtom khawh nak ding ah Chinland Council chungtel sinak in kan chuah tiah CDF-Daai nih an chim.

“Kan herh ngai ngai mi Daai phun tengnge hna kan i funtom khawh nak hnga caah CC in kan chuah nak a si.Daai phun tengnge hna kan i funtom khawh cun Chin miphun sersiamnak ah kan kai te lai.Chin miphun sersiamnak ding caah a hram tein a thok dingmi phu he zong tuanti dingin timh mi kan ngei. Chin miphun dihlak nih kan duh cio mi ramkhel kong tlukruan nak a um mi miphun sersiam kan duh.” Tiah CDF-Daai chairman nih a chim.

Daai phun tengne hna chungin ukhruainak a kalpi mi phu kip le hriam a tlai mi vialte hmun khat ah i funtom khawh nak hnga ding ah kan i zuam cuahmah lio a si caah CC chungtel sinak in kan chuak tiah CDF-Daai nih July 12 ah CC chairman sinah caa an pek hi a si.

Daai hmunram le Daai phun tengnge vialte hna kong he aa pehtlai mi ramkhel lei kong vialte cu Daai Regional Council – DRC nih a tlaih dih lai tiah CDF-Daai nih an langhter.

A tu lio i Daai hmunram ukhruaitu phu le CDF-Daai nih hin Daai phuntenge hna umnak vialte an huap khawh lo caah peng 4 chung um mi Daai phuntengnge hna cu tonnak an ngei i Daai Regional Council an dirh hi a si.

“Daai phun tengnge hna Chinland Council in an chuah mi cu Chinland Council i zulhphung le upadi cungah an lungtlin lo bia si loin i funtom an duh caah an chuah bia tu a si.Daai hruaitu vialte hna zong nih peng 4 chung um mi vialte funtom an duh caah a tu bantuk in an chuah hi asi tiah kan ruah piak ko hna.” Tiah Chinland Council secretary Salai Paul nih a chim.

A luancia 2024 May thla canceu ah khan a voi khat nak Daai phun tengnge vialte i tonpumh nak an ngei kho i peng 4 chung i Daai hruai tu hna an chuak cio.cuka ah cun i funtom dingin lungtlin nak an ngeih lawng si loin zulhphung le Daai Regional Council zong an dirh khawh hi a si.

Kha hlan vialte ah peng 4 chung in ukhruaimi Daai miphun vialte cu i funtom in Daai Regional Council hruainak in uknak pakhat taang an kal dingin timhtuah nak an ngei i Daai hriamtlai vialte i fonh dih in CDF-Daai tiah an dir lai kong zong DRC nih May 29 ah khan an rak thanh.

Chin miphun vialte hna lungrualnak,Chinram sersiamnak le ttanhhlei ngeilo mi Chin dothlennak phu kip he rian kan tuanti lai tiah DRC nih cun an chim fawn.