Yin Paung Tine khua ah SAC ralkap nih khuami 22 leng an thah hna i inn pawl zong mei an khangh hna
Sagaing ramthen,Yinmarbin peng,Yin Paung Tine khau cu August 13 ah SAC ralkap cu rallamsial ding in an ra i vanlawng pawl in an kah hna hlei ah khua chung ah an lut i khuami pawl an tlaih hna i an thah hna tiah khuami nih an chim.
Yin Paung Tine khua chung ah ni 3 chung an um i August 16 ah an chuak.Cu an chuak hnu long ah an thah mi hna khuami ruak 22 cu hmuh a si tiah theih a si.
“August 13 ah khan helicopter 6 in a pawng kam pawl an kah.Mah dih in khua chung ah an lut i an hmuh mi minung,sa ram pawl an thah dih hna.Inn pawl zong mei an khangh.An chuah hnu in a tu tiang kan hmuh mi ruak cu 22 an si.An thah mi hna hi mah long an si lo kan kawl rih hna lio a si” tiah khuami pakhat nih a chim.
Helicopter in an hmuh mi poh an kah caah phungki sianginn le Buddha pawl zong an rawk tiah theih a si.
“Kahdohnak hi nili hrawng a si.SAC ralkap nih thazaang tam piin an rak doh hna.Natein an tei hna lo ah cun inn pawl mei an khangh hna.Minung an hmuh hna cun minung pawl an thah hna.Inn pawl zong a dih deng cang.SAC ralkap nih phungki sianginn,Buddha pawl zong hrial lo in vanlawng in an rak kah.Mipi pawl le PDF pawl zong sunghnak an hmu tiah theih a si tiah khuami pakhat nih a chim.
Yin Paung Tine khua khuami pawl i an ruak leng in sa ram an thah mi pawl zong an kawl hna i ram runvennak phu pawl nih tha tein mei an khangh hna.SAC ralkap lei a thi mi kha cu SAC ralkap nih an lak hna tiah khuami nih an chim.
A tu lio ah Yinmarbin peng le Pale peng pawl ah SAC ralkap le mipi vengtu phu kar pehzulh in kahdohnak a fak nain mipi vengtu phu lei ah kuan i zat lonak harnak a um tiah PDF phu nih an chim.(Crd.Ayeyarwaddy Times)
