Yee-Oo Pengkulh Chung Ah GAD le Fimcawnnak Zung Lei In Minung 30 Hrawng Nih CDM An Tuah
Sagaing ramtthen, Yee-Oo peng chung ah General Administration Department (GAD) le Fimcawnnak lei rianttuantu 30 dengmang nih rian dinhnak ca an chiah tiah tualchung mi hna nih an chim.
Rian chuahnak ca a chiami hna hi Pegyi, Zeyawadi, Monetanpyin, Hnawkone, Sytha le Pohdaw khua hna in GAD cazi pawl le siangcachim hna le sianginn cazi hna an i tel hna.
Chuahnak ca an ttial mi chung ahcun kan rian hi ttuan kan huam tilo tiah an ttial hna nain, Hi hmun hrawng hi tualchung hriamtlai simi PDF thazaang tthawnnak hmun an si hna caah an humhimnak caah an chuah deuh si lai tiah Yee-Oo khuami pakhat nih a chim.
”PDF nih ni 15 chung ah chuak dih uh an ti hna i cu ruang ah an chuah hi a si men lai, nan chuahlo ahcun sual kan in phawt hna la cucun kan in tuah hna lai ti bantuk in hrocer nak cu an chim lo, Nain ralhrang lei ttangmi dalaan le Pyusawtthi pawl tu hi PDF nih an tthuat pah lengmang hna caah tu bantuk in ralhrang kuttang rianttuan pawl an rian in an chuah hi a si kho men” tiah a chim chih.
Yee-Oo Peng fimcawnnak Committee nihcun ” Kan pengchung fimcawnnak cu NUG Cozah tthithruai ning in kan kalpi lai i sianghngakchia hmuhimnak cu PDF nih ttuanvo an lak lai i caan karlak fimcawnnak ttuanvo cu Siangcachim CDM le Cathiam sang hna nih an kal pi lai: CDM tuah lomi cu zei bantuk hmanh ah telh an si lailo ” tiah a thanh.
Ref:BBC
