Bago ramthen,Yedashe peng,Suayuamahgyi khuate pawng ah SAC ralhraang le dothlennak ralkap hna karlak ah kahdohnak voi 2 a chuak i SAC lei minung 50 tluk an thi i dothlennak ralkap lei 4 nunnak liam ve tiah theih a si.
April 17 zinglei slm 5:45 tluk ah Yehdashe peng Myaung-To khua in Suayuamahgyi khua lei panh in akai mi SAC ralhraang thazaang 150 tluk cu dothlennak ralkap ttangti phu hna nih an kah hna caah zanlei slm 3 tiah kahdohnak voi khat a chuak,cu hnu ah zanlei slm 6 le 7 kar ah kahdohnak voi 1 a chuak than tiah theih a si.
A voikhat nak kahdohnak ah hin SAC ralhraang 30 leng an thi i hliam tuar zong an tam ngai ngai,SAC a thi mi le hliam tuar mi hna cu Motor lian mi in an phurh hna,a voihnih nak kahdohnak zong ah hin SAC ralhraang tam ngai an thi than i cu ni kahdohnak ah SAC ralhraang a thi mi hi 50 tluk an si tiah theih a si.
Kahdohnak chung ah SAC ralhraang lei a thi mi an tam caah SAC nih Jet Fighter hmangin voi 3 kahdohnak a rak tuah lawng si lo in hriampi le Machin gun hna hmang in chun nitlak kahdohnak a bawmh hna caah mizapi inn cheukhat a rawk.
Cu kahdohnak cu Pawani Column,Kiku Column,Naypyidaw Column le 3501 division 3 le 4 hna ibawm in an tuah mi a si.kahdonak chung ah Pawani column in ralkap Ye Yint Thu,Kiku column in ralkap Solar,Naypyidaw column in rakkap Tha Ye le Naypyidaw Battalion 901 in ralkap pakhat hna nih ram le miphun caah nunnak an pek leng ah dothlennak ralkap 8 hliam an tuar tiah theih a si.
