UN ah Myanmar palai a simi U Kyaw Moe Tun thah a timtu Myanmar mi pahnih cu tlaih an si cang tiah Audrey Strauss (United State Attorney for the Southern District of New York), Jacqueline Maguire (Acting Assistant Director in Charge of the New York Field Office of the Federal Bureau of Investigation-FBI) le Darmot Shea (Police Commissioner of the City of New York) nih August 6, tuni (Friday) ah thanhnak an tuah.
An tlaihmi Myanmar mi pahnih hna cu kum 28 a simi Phyo Hein Htut le kum 20 a simi Ye Hein Zaw an si. Hi hna pahnih nih hin US ramchungah U Kyaw Moe Tun cu thah ding, asiloah fak piin hliamtuar ter dingin timhtuahnak an ngei tiah Attorney Audrey Strauss nih a chim.
New York khuapi ah a ummi Phyo Hein Htut le Ye Hein Zaw cu July le August 5 chungah U Kyaw Moe Tun thah dingin khuakhannak an ngei, tiah theih a si. Cuti timhtuahnak an ngeih lioah cun Phyo Hein Htut nih Thailand ramri ah a ummi Myanmar ralhrang hna sinah phungning loin hriamnam a zuarhtu pakhat cu pehtlaihnak a tuah. Cu pa he an i chawnhnak ah cun U Kyaw Moe Tun cu fak piin hliamtuar ter ding, cuti hliam a tuar hnu zongah a rian in a aa ngol lo ahcun thah ding tiah lungtlinnak an ngei.
Cu hnuah Ye Hein Zaw nih Phyo Hein Htut cu phone in a chawnh in phone in tangka kuatnak App pakhat hmangin US $4000 a kuat colh. Hihi fak piin hliamtuar ter nak ding caah a si. Thah ding dirhmun a phak i an thah khawh ahcun US $1000 pek chap dingin Phyo Hein Htut nih a halmi cu Ye Hein Zaw nih a hnatla tiah cathanh chuahmi ah an laughter.
Phyo Hein Htut le Ye Hein Zaw cu timhmi ngei tein minung hawi pakhat khat tukvuak timhnak le ramdang palai pakhat thah timh sualpuhnak in New York i White Plains khua ah a ummi Pengkomh biaceihzung nih taza an cuai cang hna. An sual ko tiah biakhiah piak an si ahcun kum 5 thongdan pek an si lai.
U Kyaw Moe Tun thah timhnak kongah Myanmar ralhrangbu an i tel/rawlh hrimhrim ko lai ti hi mi tampi zumhning a si. Asinine ralhrangbu lei nih zeihmanh chim/thanmi an ngei rih lo.
