Chin ramkulh,Tonzang peng khua chung hna ah kahdohnak hrial piak dingin Tonzang biaknak lei upa hna le khuanu khuapa hna nih thawng an thanh.
Democracy serchuah nak ding lamtluan ah dawn tu si kan duh bia si lo in minung le minung i zawn ruah nak he kan thanh mi a si tiah Tonzang khuanu khuapa nih cun an thanh.
“Cathanh an chuah mi kha a hman ko,an chuah hnawh chan cu khua chung hrim hrim ah kahdohnak tuah lo in hrial piak ding ti a si.khua chung ah kahdohnak an tuah ah cun inn le lo kangh te hna a chuak lai ti an phang.hi cathanh hi meeting an tuah hnu ah an chuah mi a si” tiah khuami pakhat nih a chim.
Tonzang khuami hna nih kahdohnak ruang ah inn le lo a rawh lai hi an thin a phang ngai ngai tiah an cathanh chungah an langhter.cu a si caah khuami hna khuasak tintuk nak inn le lo a rawh nak hnga lo khuachung hna ah kahdohnak tuah lo ding tiah an thanh hi a si.
Tonzang khuami hna cu um nak inn hi a biapi bik ah a chia mi an si i umnak inn te a um ko ah cun rawl le ti idinh zongin aa chang kho mi an si kong,thazang dihlak in sak mi inn a kangh ah cun an caah sungzatlaknak ngan bik a si lai kong an langhter chih.
A tu ah Tonzang khuapi palik len pawng ah kahdohnak a chuak lai ti ruang ah inn aa thial mi inn 15 tluk an um cang tiah theih a si .
A tu lio ah hin Tonzang khuapi chung ah ZRA ralkap hmuh len ding an um tiah theih a si. Hi kong he pehtlai in CDF-Tonzang nih kahdohnak tuah kan timh mi cu SAC le a hawikom hna thio ding ah a si i khuami inn duah ruah ah kahdohnak tuah aa tim mi kan si lo tiah May 7 ah cathanh pakhat an chuah ve.
“Khuami hna nih khua an i ruahsual nak ding ah bia vaivuan a tam ngai,Tonzang khuapi mei khangh dinin an ra lai tbk,Tonzang khuachung um Zomi inn poah poah an duah lai ti bantuk bia hna a leng.kan nih cu mizapi inn duah tu ding kan si lo i mizapi a humhim ding tu kan si” tiah CDF-Tonzang rian ngeitu nih a chim.
Chinland council ralkap hna cu mizapi a humhim tu ding kan si caah online chung i bia vaivuan le a leng i bia vaivuan hna zumh lo ding ah CDF-Tongzang nih cun an langhter.
Tonzang peng chung ah hin SAC he ttangti mi ZRA,PDF – Zoland,CDF-Tongzang le PDF Thado defense Force tiin hriamtlai phu 4 nih hram an bunh tiah theih a si.
