Shan ram chaklei ah TNLA nih an laak cia mi khuapi 3 ah SAC nih Martial law a thanh mi cu TNLA nih cohlang loin zulhphung chuahmi vialte kan hnawn cang tiah nihin March 6 ah cathanh an chuah ve.
Shan ram chaklei 1027 Operation lio ah Ta’ang National Liberation Army – TNLA nih an rak laak cang mi Mantung,Namhsam le Namatu peng chung vialte cu SAC nih March 4 ah Martial law a thanh hi a si.
Cu tin SAC nih Martial law a thanh mi ruang ah Ta’ang mizapi lungrethei in an um caah SAC thanhmi telh in 1027 operation chung ah rak chuah mi nawl vialte kan hnawn than tiah TNLA nih an thanh hi a si.
1027 Operation chung ah TNLA nih a laak mi khuapi 7 hna ah ukhruainak kalpi a si cang i thancho lei kan panh cang caah zaan chuah lo ding timi nawl chuah mi le 1027 operation chung zulh phung chuah mi vialte hrawh a si kong an langhter.
SAC nih martial law a thanh mi cu Ta’ang mizapi nih zulh a hau lo i TNLA nih a thanh mi lawng mizapi nih zulh ding tiah an langhter.TNLA nih laak cia mi khuapi hna ah hmunhma daih nak,Upadi ning in kalpi nak,rithaisi doh nak le ukhruainak hna kalpi cuahmah a si cang tiah theih a si.
Kawl ram chung hmun vialte ah SAC nih Martial law a thanh nak khua vialte hi khua 61 a si cang tiah theih a si.
