Thla 4 chung Chin National Defense Force (CNDF) le SAC ralhrang kahdohnak ah SAC ralhrang lei in Captain rank telh in ralhrang a tlawm bik 100 hrawng an thi, tiah CNDF nih thawng an chuah.
Aluancia thla 4 chung ah Falam peng le Kalay peng chung ah CNDF le SAC ralhrang karlak kahdohnak voi 8 a chuak i ralhrang a tlawm bik 100 hrawng a thih bang in CNDF lei in minung 8 an nunnak a liam.
“Falam peng lawng si loin Kalay peng chung Kabani, Tharsi le Thanphu kiangkap zong ah SAC ralhrang doh kan bawmh hna. Kahdohnak voi 8 a cang i SAC lei in ralbawi Captain rank telh in minung 100 hrawng kan thah khawh hna. Kanmah lei in minung 8 an nunnak a liam ve,” tiah CNDF ttuanvo ngeitu pakhat nih Mizzima ah a chim.
CNDF cu Chin National Organization (CNO) tang ah a cawlcaangmi Falam peng chung hriamtlai bu a si.
NUG, CRPH, CNF, ZRO (E), CDF le PDF he ttang tti in Federal Democracy rampi ser a si tiang ral kan do lai, tiah an dirhmun an langhter.
Mizzima
