Thinlung Kilven Herhmi Cu

by Rev. Sang

Yangon Sedona Hotel ah 2015 Asian Disability Forum tel ding in Kalaymyo in ka rak i thawh. Yangon airport in Taxi ka hlan. Lampi ah Taxi mawngtupa nih cun datsi rawnnak ah a ka kalpi. Ruahlo pi in a van ka chim pahmi cu datsi dawr ngeitupa a theihmi a sinak, a hlan ah misafak a sinak, amah nakin a rak rum deuhnak kong le ning cang lo in phaisa a rak kawlmi a sinak le a rumnak kong kha a van ka chim. A si taktak le si taktak lo cu ka thei lo nain ka ruahmi cu Taxi mawngpa hi a nunnak ah thinlung thazaang dermi a si caah amah thinlung thazaang thawnnak dingah a ka chimmi a si ti cu kaa fiang.

Mi pakhatkhat nan ton tikah thinlung thazaang dermi a si ahcun:-

1. Midang tlamtlin lonak tete chim a duh peng lai i, amah thilti khawhnak aa chim peng lai. Midang nakin a fel deuhnak le a that deuhnak kha hal loin langhter aa zuam. A riantuan hawi le a hawikom soiselnak le tlinlonak langhternak tete chim a hmang lengmang lai.
2. Phorhlawt a hmang lai. Thil a rak ti khawhnak kha zeihmanh pehtleihnak ngeilo pi khin chim le phuan a hmang lai.
3. Bia pehtlai lomi pi khin a dinnak, felnak, thatnak lawng te chim a hmang lengmang lai.
4. Hmaitonh tein bia i ruah lioah a mit a thial lengmang lai.
5. Midang he hmunkhat te um ti, biaruah ti a duh tuk lai lo. Amah te lawngin um a duh deuh fawn lai.

A Cunglei Thinlung Put Phun (5) Na Ngeih Ve Ahcun:-

1. Na thinlung kha kilven a herh. Na thinlung kha retheih tertuk hlah. Abianaah phaisa lei sungh le zatlak na ton sual ahcun na sunghmi nakin Pathian nih an pekmi thil a tamdeuhnak, nan nun man a sunlawi zia le sunghnak tonmi zong hi hmailei ralrinnak lam theihnak a sinak le Pathian dawtmi na sinak kha a thar in ruah peng a herh.
2. Midang he tahchunhnak na ngeihmi vialte kha ngol cang. A taktak ahcun minung nunnak hi ‘midang he tahchunh ding a si bal lo’. Mah te tu in zeitindah kan thancho ve lai tiah fakpi tuin i zuam dingtu a si deuh.

A cunglei thinlung put phun (5) he aa pehtlaimi na pawngkam ah an um tikah:-

1. Nehsawhnak le zeirel lonak in um lo in zeitindah a thinlung thazaang ka pek lai? ti tu in naa zuam a herh. Bia elnak siloin a thinlung nuamhter i zuam ko.
2. Amah, minung a sinak zawnah a thatnak thil te kha chimh khawh i zuam ko.
3. Zeiruang ahdah a thazaang a der tiin biatak tein ruat law a thinlung a thawnnak lai thazaang pe peng.

Pathian Bia Nih Cun:-

1. Rom 12.3b, “Nanmah le nanmah kha a sang tuk ah i ruat hlah u. Nan siningte tu kha i hngal u law, Pathian nih zumhnak an pekmi hna ning cio ah nanmah le nanmah nan i ruah cio ning cu si seh”.
2. Gal 6:3, “Ahohmanh nih, zeihmanh si set ṭung loin, pa ka si ve tiin aa ruah ahcun amah le amah aa hlen a si.” a ti.
3. I korin 8:2, “ Zeizong ka hngal ve ko, tiin aa ruatmipa nih hin a hngalh awk tlukin a hngal tawn lo” tiah kan hmuh.

Na thinlung put cu na biachimmi nih a langhter zungzal. Bruce Milne nih a chimmi cu, “A hmanmi Khuaruahnak nih a hmanmi nun a thawk’ (Right living begins right thinking). John Stott nih cun, “Thianghlimte khuaruahnak nih aa thupmi thianhlim nun a ngeihter” tiah a ti. (The secret of clean living is clean thinking). Lungre theihnak kan ton lio a si caah ralrin cio kan herh ko hih! Na pom ve ahcun comment ah “Amen” rak ti ve tuah.