The Grace Ministry (TGM) nih Rev. NC Thawng Tha Thang cu Ralzaam hna cung ah siseh, atulio COVID-19 raldohnak ah luhlinh in a riantuannak theihpinak le upatnak ah tiin TGM Good Samaritan Award an pek.
“TGM kan riantuanti hawi Rev. Thawng Tha Thang kan ram caah fak piin a riantuan mi zoh in “TGM Good Samaritan Award” kan pek. Bawipa nih kan miphun, kan ram le vawlei mi vialte caah hmang chinchin ko seh,” tiah am facebook cahmai ah an langhter.
Rev. NC Thawng Tha Thang nih rian dangdang a tlaih lio mi hna-
Believers Church Myanmar ah General Secretary le Chinland Football Club ah President a tuan liomi a si. Myanmar Football Federation (MFF) 2020 Congress thimnak ah a lut i teinak a hmuh hnu in MFF ah Executive Council member rian a tlai. MFF EC member a sinak in MFF nih rian an pek mi hna cu Infrastructure Development Committee chungtel, Youth Development Committee chungtel le Referee Committee chungtel rian hna an si. 2018 Russia i rak tuah mi FIFA world cup zong ah Myanmar ram MFF ai-awh in thlah mi ah a rak i tel. Hi rian hna pin ah Chin miphun huap in siseh, Myanmar ram huap zong in siseh, rian lianngan tampi a tlaihchih hna.
Atulio ah rian dang a tlaih cuahmah mi hna cu 2010 kum thok in Gospel for Asia (GFA) ah Vice President le Believer Church Theological Seminary ah Vice President hna an si. 2014 kum thok in Myanmar Christian Youth Alliance ah Patron, 2016 kum thok in Myanmar Theological Student Council ah President, 2017 kum ah Myanmar Evangelical Christian Alliance Literature and Publication Commission Director, 2018 ah Myanmar Evangelical Christian Alliance Mission Director a tuan hnu ah 2019 kum thok in Myanmar Evangelical Christian Alliance (MECA) ah Associate General Secretary ah thim than a si. 2019 kum thok in Chin Public Company ah Board of Director le kum 2019 thawk in Chin Ethnic Entrepreneur Association (CEEA) ah Ruahnakpetu (advisor) zong a tuanchih.
Cu hlan ah a rak tlaih bal mi rian hna cu 2005 in 2010 kum tiang Believers Church Myanmar National Council ah ah Mission Assistant Director le 2017 in 2019 kum tiang Believers Church Theological Seminary ah Principal hna an si.
Hi bantuk rian lianngan pin ah ngakchia harsa zohkhenhnak le fimcawnnak lei zong ah rian tampi a tuan mi a si. 2009 kum ah Bridge of Hope timi Ngakchia Zohkhenhnak Bu a rak thokpi hna i, ralkap uknak chan lio i sianginn kainak caah chawva lei harsatnak a ngei mi ngakchia hna Chin Ramkulh in minung 800 le Chin ramleng (Myanmar ramchung) in ngakchia 400 (an dihlak 1200) hna cu kum 10 chung bawmhnak an pek hna. Atu ramkheel lei dirhmun a that hnu in fimcawnnak lei kan miphun hawi hna an tikhawhtawk bawmchan rih ding in a pa Bishop CK No Chhum he Myanmar Flower International School (Yangon), le Chinland Flower Private School (Thantlang) an dirh.
