Chin ram Taingen SAC sakhaan laak kahdohnak ah SAC ralkap minung 30 an thi i miphun ralkap lei minung 8 nunnak a liam ve leng ah 40 leng nih hliam an tuar tiah CDF-Siyin in rianngeitu Salai Rambawi nih a chim.
“Sakhaan laak kahdohnak chung ah SAC an sakhaan chung um mi hna he Phone in kan i chawn kho ko hna.nan hriam chia uh kan ti hna nain chungkhar kan ngei ve rih i hriamchiah awk kan tha lo tiah an kan ti i cuticun chimh khawh loin an sakhaan chung ah cun thih tu an i thim deuh caah Taingen sakhaan um mi vialte an thi viar a zam mi zong an um lo” tiah a chim.
January 12 zanlei slm 5:00 tluk in CNA,CDF-Siyin,CDF-Thantlang, CDF-Hakha,CDF-Hualngoram, CDF-Zanniatra,PDA leTCDF hna hna nih an doh hna i nihin January 16 zinglei slm 7:30 tluk ah tlamting tein an laak khawh hi a si.
SAC a thi mi hna chung in Ralkap Captain pakhat le palek bothum pakhat tel in Taingen sakhaan ah a um mi an zapi minung 30 an thi tiah theih a si.
Chin pasaltha hna lei zong in CNA in pakhat,CDF-KKG in Pali,CDF-Thantlang in pakhat,CDF-Siyin in pakhat le CDF-hakha in pakhat tiin an zapi pasaltha 8 nih nunnak an pek ve.
Taingen sakhaan cu a luancia 2023 chung ah Chin hriamtlai hna nih voi 4 tiang rakdoh a si cang nain an rak laa kho lo.a voi nga nak a tutan ah tlamtling tein an laak khawh.Taingen sakhaan laak hi a har hringhran tiah theih a si.
“A har taktak si,CNA lei zong nih kan tuk bal mi SAC sakhaan vialte lak ah a har pawl a si lai tiah an chim ve.Metre 70 chung tluk te ah bi te le fek thup in kuan kham zong thatuk in an tuah mi a si” tiah Salai Rambawi nih cun a chim.
