Chin ramkulh Kalay in Chaklei laitlang kainak Taingen khua hrambunh SAC Sakhaan kahdohnak ah zapi ralkap lei in minung 2 nunnak a liam i 7 hliam an tuar tiah CDF Siyin phu nih an chim.
Chin National Army CNA le CDF Siyin nih Taingen Sakhaan cu Nizan January 12 zaanlei sang khan kahhram an thok i nihin January 13 chun tiang ah kahdohnak an ngol rih lo tiah theih asi.
“A tu tiang cun kanmah lei minung 2 nunnak liam cang,7 nih hliam an tuar.kahdohnak cu pehzul in a chuak rih ko.SAC lei hi minung 5 hrawng lawng an taan cang caah SAC lei nih Vanlawng he Hriam ngan he voi tampi a kah bawmh cuahmah hna. A tutan cu kan kir tak ti lai lo kan laak hrim hrim lai” tiah rian ngei tu pakhat nih Zalen ah a chim.
Nihin Zinglei sang ah SAC nih Taingen khua cu Jet Fighter in voi hnih tiang bomb a rak thlak i chun hrawng zong ah Taingen pawng Suanhlim khua ah bomb a rak thlak than tiah theih a si. Kalay University chung um SAC ralhraang zong nih hriamngan lung 30 nak tlawm lo an kah cang tiah theih a si.
Taingen khua ummi tualchung mi hna cu a luancia December thla thok khan a pawngkam khua le Kalay lei ah ral an zaam cang hna tiah theih a si.
