Sudan Uknak Latu Ralkap Nih Lamzawhmi Mizapi Minung 15 Kah Thah
Sudan ram ralkap nih uknak an lakmi cu mizapi nih duhlonak lamzawh in an dohkalh caah November 17 ah Lamzawhmi minung 15 an kah thah hna i minung tampi hliam an tuar. Hihi October 25 ralkap nih uknak a lak hnu in thahnawnnak a tambik ni a si.
Minung 15 an kahthah hna nak hi Khartoum khuapi ah a si i, Ralkap nih uknak a lak hnu buainak chuah hnu in a thimi minung 39 an si cang Democracy a dirkamhtu doctor phu hna nih an chim i hliam a tuarmi za lengkai an si cang tiah theih asi.
”Nihin i a bubu in thah kan ton caah kan dai hlei lailo, a zual in kan zual chin la, uknak latu ralkap he ceihhmai ttinak kan ngei lailo, i cawkzuarhnak kan ngei lailo timi hi kan au pimi tlangtar a si tiah Sudan Professor Alliance (SPA) i lamzawh hruaitu hna nih an chim.
Sudan ralkap nih uknak an lak hnu in phone line, Internet line pawl an phih ko nain mazapi cu khuapi lamcung ah chuak in ralkap uknak duhlo nak an langhter tthiamko tiah AFP nih a ttial.
”Mizapi nih kan i thimmi cu zauk phung asi, tiah lamzawh hna cu an au i Sudan ralkap hruaitu Abdel Fattah al -Burhan an duhlonak cu an aupi.
Nunau , tar le hngakchia nih lamzawhmi pawl cu kutbengh in thazang an pek hna i biatak tein ralkap uknak cu an doh ve .
Lamzawhmi kan kah hna ah meithal kuan kan hmanglo raba kuan kan hman tiah police nihcun an ti nain minung a thimi hna zoh tik ah meithal kuan tak an hman ko tiah theih khawh asi tiah AFP nih ttial.
