2022 February in 2023 September thla dih Kum (2) deng caan chung ah Social media hmang in SAC ralhrang hna a dohkalh tu,mipi cawlcangh nak le dothlen nak lei he pehtlai in caa a tial tu minung 1316 cu tlaihkhih an tong tiah Nuhrin covo buar piak a tong mi hna zohkhenh tu phu Data For Myanmar nih October 8 ah a thanh.
SAC ralhraang lei nih Social Media hmang in ruahnak karhter nak caa,tlerhkhawnh nak caa a tial mi poah cu Upadi phung 52(A) ,Phung 505 (A) in le Phung 33 (A) hna hmang in dantan nan si lai tiah 2022 January 25 ah a rak thanh.
Tlaih a tong mi hna chung in Yangon in minung (323),Mandalay in minung (284) an si i Bago ramthen,Magwe ramthen le Ayeyawaddy ramthen hna telh in kawlram chung hmunkip in tlaih khih an tong tiah an langhter.
Vulei cung hmun kip ii internet zalen nak a um lo bik mi ram hna chung in Myanmar cu a (2) nak ah a um tiah American hrambunh Freedom House nih October (4) ah an thanh.
Hram hram in uknak laak a si sinin 2023 September thla dih tiang ah kawlram chung hmun kip in a ruang tampi in tlaihkhih a tong mi dihlak ah minung (19669) an si cang tiah ramkhel kong ah thongtla mi a zohkhenh tu phu AAPP nih October (6) ah a thanh ve.
