Rakhine ralkap AA nih Paletwa peng Shinletwa sakhaan a laak tan ah Mizoram lei a rak zam mi SAC ralkap minung 100 leng cu nihin January 9 ah India cozah nih Aizawl airport in Myanmar ah akuat than hna tiah theih a si.
SAC ralkap Thazaang 200 tluk in hmun an khuar nak Shinletwa sakhaan cu AA nih January 2 lio ah a rak laak i SAC ralkap cheukhat hna cu Mizoram ah an rak zam than hna.a zam mi SAC ralkap cu AA le MDF nih an dawi than hna i January 5 ah Kaphnihkar kahdohnak a chuah caah SAC ralkap minung 6 an thi i 10 nak tlawmlo tlaih an rak si.
2023 December 29 lio ah Paletwa peng SAC Point 377 cu AA nih a rak lak i cu lio ah SAC ralkap minung 151 cu Mizoram ah an rak zam i india cozah nih 2024 January 2 ah Myanmar sin ah a rak kuat than cang hna.
