Myanmar ram chung tlangcung hriamtlai vialte lak ah a thazaang a tthawng bik mi ‘ဝ’ UWSA cu operation 1027 aa thok hnu in a voi khat nak kahdohnak ah a vun itel ve i unau phu thum he ttangti in Tuluk-Myanmar ramri Hupan khuapi cu nihin January 5,2024 ah an laak.
Hupan khuapi cu 2008 constitution ning in ‘ဝ’ mahte uknak hmun ram i an khualipi a si.Hupan khua cu MNDAA nih a laak cang mi Kuanlung khuapi in nichuahlei meng 11 tluk aa hlat nak ah a um i Tingni khuapi in nitlak lei meng 9 tluk aa hlat nak ah a um mi a si.
Hupan khuapi chung um SAC palek sakhaan,Administration zung le SAC hmunkhuar nak dang hna i ralkap hna nih MNDAA le ttangti phu hna sinah nihin January 5 zinglei slm 5:00 tluk ah hriam an chiah hnu ah UWSA phu hna zong khuapi chung ah lut ve i an puanlang an taar hnu ah khuapi cu an tlaih tiah theih a si.
‘ဝ’ UWSA ralkap hna cu chanthar hriamnam tampi an ngaih leng ah ralkap thazaang 30,000 an nei tiah theih a si i 1027 operation aa thok ah khan khoi ka lei hmanh ttang lo in a karlak ah ka um tiah a rak thanh.
