Sagaing ramthen pengkomh kip in Non-CDM pawl a ran nak in CDM tuah ding tiah NUG nih a thanh hnu in SAC kuttang palek hna le zung rian tuan tampi cu CDM an tuah hna tiah theih a si.
NUG nih ralrin pek nak cathanh a chuah hnu in sagaing ramthen Kata pengkomh,Kawlin pengkomh le WonThu pengkomh hna in Non CDM zung riantuan minung 244,palek le thonginn riantuan hna 44 an zapi minung 288 nih CDM an tuah tiah theih a si.
A tu bantuk in CDM a tuah tu hna cu NUG nih 2023 January 20 ah a rak thanh mi CDM zulh phung ning tein tawlrel cuahmah an si tiah theih a si.
Sagaing ramthen chung in Kawlin khuapi cu KIA le PDF ttangti phu hna nih November 6 ah an rak tuk i tlamtling tein an laak khawh mi a si.
