SAC le ttangti phu 3 hna cu a voi thum nak tonnak an ngei than i cu ton nak ah SAC nih MNDAA cu hriam chia ding in an hal hna tiah theih a si.
MNDAA cu Shan ram chaklei special hmunram 1 dirhnak nawl kan in pek hna lai nain MNDAA nih hriam nan chiah lai tiah an hal hna hi a si.
Ttangti phu 3 hna le SAC hna cu tuluk tawlrel piaknak in January 7 in 9 tiang tuluk ram Yunnan Peng Kumin khua ah tonnak an ngeih hi a si.
“SAC nih Kokang hmunram Special 1 dirhnak nawl kan in pek hna lai an ti hna.sinain Kokang ralkap hna cu hriam an chiah ter hna.cun SAC kuttang ah um ter an duh hna a si.cu caah an biaruahnak a tlamtling lo” tiah Shan News nih a langhter.
Hram hram in uknak a laa tu SAC kut chung in Shanram chaklei cu an tuk hnu nunnak tampi liam hnu ah SAC sin hriam chiah ding dir hmun a si caah an itonnak hi tlam a tlin khawh lo nak a si.
Unau ttangti phu 3 le SAC hna cu aluancia 2023 December 11 in 13 tiang,22 in 24 tiang le a tutan January 7 in 9 tiang tiin voithum tiang an i tong cang nain an tlam atling kho rih lo.
SAC le ttangti phu 3 hna kar kahdohnak hi Lashio le Mandalay tiang a phan kho mi a si tiah Shan ram ramkhel kong thiamsang hna nih an chim.
Shan ram chaklei ah pehzul in kahdohnak a chuah cuahmah i Myanmar mizapi hna nih duh mi ralhraang an hram in bongh ding tiang hmai kan nor lai tiah ttangti phu 3 nih thanhnak an tuah.
