Hramhram in uknak laak a sihnu kumhnih le cheu leng caan chung kawlram chung hmunkip ah SAC ralhraang hna nih mibu in thahnak voi (22) an tuah tiah NLD nih October 11 ah a thanh.Kahdohnak a fahnak hmun a simi hna Magway,Sagaing,Bago,Kayin,KachinMon le Rakhine hna ah a tu bantuk mibubu thah nak an tuah hi asi.cutin mibubu thah ruang ah sualnak ngeilo mizapi minung (590) nunnak a liam tiah an langhter.
Minung (10) nak tam in mibu an thah nak a tamcem nak hi Sagaing ramthen ah a si i voi (14) asi.Achang tu ah Kachin ramkulh asi i voi (3) a si.Magway,Bago,kaya,Mon le Rakhine ramkulh hna ah voi (1) cio an tuah .
Sagaing ramthen Kanbalu,Pazikyi khua ah vanlei in bomb a thlak ah mizapi minung (168) nunnak a rak liam.Kachin ramkulh,Hpakanh peng Ananpa khua ah vanlei in bomb a thlak caah minung (62) nunak a rak liam ve.
Tuthla October 9,zaan slm 11:00pm ah Kachin ramkulh Laiza pawng ralzaam riahbuk ah vanlei in bomb a thlak than caah hngakchia minung (10 ) telh in minung (29) nunnak a liam than.
Cutin thah le nawn a tong mi Myanmar ram mizapi hna nih tlukrual nak an hmuhkhawh nak ding ah le bawmhnak pek ding in UN telh in ramkip nih a tunak fakdeuh in ttanpi ding ah NLD nih nawlnak zong a tuah.
Ramkhel kong ah thongtla hna a bawmchan tu phu AAPP nih October 11 i an langhter mi cazin ningah uknak laak a si hnu in Myanmar ram ah nunnak a liam mi dihlak minung (4145) an si cang tiah theih a si.
