Shan ram chaklei Laukkaing regional military command kuttang Konkyan hrambunh SAC IB 125 battalion in SAC ralkap 93, Pyithusit in 27 le palek minung 11 telh in minung 272 hna cu puan rang thlai in nizan November 28 ah MNDAA sin ah hriam an chiah i an i ap tiah theih a si.
MNDAA nih cat lo in an kah hna caah Konkyan um ralhraang sakhaan pi le a pawng um ralhraang sakhaan 5 cu felfai in laak a si cang i SAC ,Pyithusit le palek hna cu an chungkhar hna he minung 270 tluk hriam chia in MNDAA sin ah an i fonh .
MNDAA nih thawng ngai in an kah hna ruang ah SAC Southeast military Command kuttang IB 125 battalion cu hriam chiah an duh kong MNDAA sin ah pehtlaih nak an tuah hnu ah hliam tuar mi SAC ralhraang hna cu thlop piak ding in le chungkhar hna he dor an duh kong IB 125 i battalion commander nih MNDAA sin ah a nawl hna caah MNDAA nih an cohlan hna i November 28 zanlei slm 4:00 tluk ah an i fonh hi a si.
No.16 Military Operation Command in Commander nih November 27 ah a ralkap minung 100 tluk cu a tlik pi hna tiah hriam a chia mi IB 125 i battalion commander nih a chim.
Hriam chia in MNDAA sin ah aa fonh mi hna cu Kaw miphun pyitusit phu in minung 27,IB 125 battalion in ralkap 93,Military Operation Command No.16 in ralkap 36, Military Operation Command No.12 in ralkap 14,ralkap chungkhar minung 86,ral lei ruahnak cheutu (Advisor) minung 5 le palek minung 11 an zapi minung 272 an si tiah theih a si.
Cu leng ah MNDAA nih hmunhma zohfel nak a tuah nak ah SAC ralkap cheukhat an tlaih chap hna tiah theih a si.
