Mawlamyine khua i ummi SAC Southeast Regional Command zungpi ah SAC ralbawi zik changtu Soe Win le Ngunt Win Swe an um lio ah a kir ti lo mi Drone( Suicide Drone) 5 hmangin bomb an thlak hnawh hna caah SAC ralbawi minung 3 an thi i 30 leng hliam an tuar,cu ti hliam a tuar mi Chung ah Soe Win le Ngunt Win Swe zong an i tel kho tiah Alpha Bats Drone Force nih an thanh.
Nizan April 8 zanlei slm 5 tluk ah khan Mawlamyine khua i ummi SAC Southeast Regional Command zungpi ah SAC ralbawi zik changtu Soe Win hruainak in meeting an tuah timi thawng kan theih caah a voi khat nak Drone in bomb rak thlak hnawh an si cang.
Nihin April 9 chun slm 1:00 tluk zong ah khan Soe Win hruainak in cu hmun thiam ah meeting an tuah than caah meeting an tuahnak room lei panh in Fixed Wing Drone 3 le helicopter 2 aa dinh nak lei panh in Fixed Wing Drone 2 hmang in bomb an thlak hnawh than hna hi a si.
Nihin i drone in bomb an dohnak hna ah hin ralbawi zik changtu Soe Win le Ngunt Win Swe zong hliam tuar mi cazin ah an itel kho tiah theih a si i SAC ralkap bawilei a si mi General rank le Brigadier general rank a si mi minung 6 hliam an tuar i cu hliam a tuar mi chung in minung 3 an thi tiah theih a si.
Soe Win Mawlamyine a phaak nak a ruang hi a tu lio kahdohnak a fah cuahmahnak Myawaddy, Tingan-Nginaung le Kawkareit kahdohnak ah amah hrim hrim nih lam nai in a um pi hna i command a pek hna timi thawng theih a si caah hi operation hi tuah a si kong kan theih.
