Russia nih missile bom in a kah caah Ukraine ah 20 leng an nunnak a liam
Ukraine ram lai ah a um mi Vinnytsia khua ngan pakhat cu nilini ah Russia nih missile bom in a kah caah a tlawm bik minung 23 an nunnak an liam.Minung 100 leng hliam an hmu tiah Ukraine i tuanvo ngeitu nih a chim.
Vinnytsia khua hi Ukraine khuapi Kyiv i nitlak thlanglei meng 167 a hlatnak ah a um mi a si. Missile bom 3 khua lai ah a tla i cozah zung pakhat zong a khen tiah Ukraine palik nih a chim.
Missile bom hi rili chung ah a um mi Russia titang tilawng nih a kah mi si i mipi inn pawl le mawtaw pawl a khen.
A dang missile bom 4 cu Ukraine vanlawng ral vengtu nih an thlak khawh tiah Vinnytsia zohkhenhtu bawi nih a chim.
Minung 370,000 leng an umnak khua ngan pakhat a si i Russia nih nichuah lei kap a doh lio ah ralzam a thong leng an rak i dornak hmun a si.
Ukraine President Volodymyr Zelenskyy nih Russia ralkap pawl nih nifa tein mipi pawl cu a doh hna i Ukraine hngakchia pawl zong a thah hna tiah a chim.Dohnak ding target a si lo mi hmun pawl a doh hna hi zaangennak hmangmi pawl i cawlcangh a si tiah a chim.(Crd.VOA Burmese)
