Myanmar ram pumpi kahdaihnak minthut NCA ah min a thu ve mi Mon Pyitit Party (New Mon State Party) nih tlancung hriamtlai hna le dothlennak ralkap hna he ibawm in SAC kan doh ve cang lai tiah nihin February 14 ah phungning tein an thanh.
“kanmah he ruahnak le dirhmun aa khat mi hna tlangcun hriamtlai le dothlennak ralkap hna he hmunkhat ah rian kan tuan tti lai,ka thazaang kan thawn ter a herh caah Mon miphun hna nih a kan dirhkamh ding ah rian kan tuan lai” tiah Mon Pyitit Party rian ngeitu pakhat a si mi Nain Bagyarle nih a chim.
Mon Pyitit Party general secretary Naingzeya le Brigadier General SaloonHtaw hna telh in ruahnak aa khat mi party hruaitu hna,Paryty chungtel hna nih SAC dohnak ah rian kan tuan lai i miphun tlukruannak le mah te khuakhan lairelnak kan hmuh khawh tiang SAC cu kan doh lai tiah an langhter.
Mon Pyitit party cu 1995 kum thok in ramkhel kong ah remdaihnak a um khawh nak hnga a nem nak in an rak i zuam nain a phichuak mi an hmuh khawh lo leng ah an sakhaan hna cu SAC nih an laak piak hna.Mon miphunpi nih tuah nak kongkau tian ah SAC nih nawl an ngeih a phun phun in Pressure an pek theo tiah theih a si.
SAC nih hramhram in uknak an laak 2021 thok in Mon mizapi hna duhnak zul in Mon Pyitit Party cu ramkhel kong ah a nemnak in lam kawl ding tiah 2021 February 12 ah an rak thanh. NCA phun ning in kum 3 chung kal a si hnu ah hi kon ah aa tel dingmi phu vialte i tel lawng ah kan duh cio mi a phi a chuak kho ding a si caah le tu tiang caihhmai mi chung ah kan I ruah chan mi pakhat hmanh kan hmu kho lo tiah an thanh.
Mon rakulh chung zongah SAC nih mizapi cu a ruang um loin tlaihkhih,thahnawn tibantuk cu nitin an tuah,A hleikhun in Kyaikhtu,Thadon,Thanphyuzayet le Yee khuapi hna ah tlaihkhihnak le hriampi kah,vanlawng in bomb thlak ti bantuk an tuah khun i mizapi inn zong an khangh caah Mon Pyitit Party cu SAC he ramkhel kong ah a nem nak in a phi khawl ding a si khawh tilo caah hriamtlai in kan doh ve cang lai tiah an thanh hi a si.
